18 eta 32 urteko bi gizonezko atxilotu dituzte gaur goizean Santurtzin, enpresa batean lapurreta egitea leporatuta.
Goizaldeko ordu bi eta erdiak aldera, Ertzaintzari jakitera eman diote alarma bat aktibatu dela eta hainbat pertsona ikusi dituztela Santurtziko El Calero auzoko industria-pabiloi batean. Herritarren babeserako dotazioak berehala hurbildu dira bertara, eta adierazitako enpresako zamalanetarako atetzarra behartuta eta jasota zegoela egiaztatu dute; gainera, zurezko tako bat zuen jarrita itxi ez zedin. Enpresa barruan hainbat janari-kaxa zeuden hautsita eta manipulatuta.
Jarraian, eta Udaltzaingoaren laguntzaz, agenteek inguruak miatu dituzte, eta lapurretako baten deskribapen fisikoarekin bat zetorren gizonezko bat aurkitu dute. Herria Zierbenarekin lotzen duen errepidearen ondoan aurkitu dute bigarren gizonezko bat sasi artean ezkutatuta, eta arropa artean pabiloian lapurtutako hainbat gauza aurkitu dizkiote. Azkenik, biak atxilotu dituzte indarra erabiliz lapurreta egitea leporatuta.
Enpresaren arduradunak emandako datuen arabera, atetzarrean egindako kalteak laurehun bat eurokoak izan daitezke. Ertzaintzak zabalik du polizia-ikerketa, gertaeran inplikatuta jende gehiago egon litekeelakoan.
Arrastatuak epailearen aurrera eramango dituzte polizia-eginbideak amaitutakoan.
