Iñigo Urkullu lehendakariak iragarri duenez, Eusko Jaurlaritzak 4 milioi euroko deialdia egingo du industria-inguruneetako gailuen eraldaketa digitalari lagunduko dion ‘Renove 4.0 Programa’ berria abian jartzeko.
«Jauzi kualitatibo berria egiteko garaia da», esan du. Ildo horretan, lehendakariak nabarmendu du «merkatuak, makina edo osagaiez gainera, soluzio osoak ere eskatzen dituela».
«Malgutasun eta zehaztapen handiagoa dakartzaten soluzioak, ekonomia zirkularraren bidez baliabideen erabileran eraginkortasun handiagoa dakartenak, zerbitzu aurreratu berriak emateko digitalizazioa eskatzen dute, hori baita industriaren erronka berria”, esan du.
Iñigo Urkulluk industria-politikaren lau eremu nagusi nabarmendu ditu:garapen teknologikoa eta digitalizazioa; prestakuntza, inbertsioa prestatutako pertsonetan eta talentua; nazioartekotzea, eta aliantzak, elkarlana eta hazkuntza.
Lehendakaria, Arantxa Tapia Ekonomiaren Garapeneko eta Azpiegituretako sailburuarekin eta Cristina Uriarte Hezkuntza sailburuarekin batera, Fabrikazio Aurreratuari eta Makina-Erremintei buruzko 21. Biltzarraren irekiera-ekitaldian izan da, Gipuzkoako Zientzia eta Teknologia Parkean. Markel Olano Gipuzkoako ahaldun nagusia eta Eneko Goia Donostiako alkatea ere izan dira ekitaldian.
AFMk antolatzen duen kongresuak industria aurreratuaren erronkak eta joerak aztertzea du helburu; halaber, «agertoki ekonomiko globalaren zailtasunetatik at ez dagoen sektore sendo baten» egoera aztertzea bilatzen du biltzarrak.
