Joan den ostiralean 28 urteko gizon bat atxilotu zuten Donostian hainbat mugikorren ebasketa-delitua leporatuta.
Goizaldeko hiruak eta laurden aldera, herritarrak babesteko lanetan Donostiako erdigunean ari zen Ertzaintzako uniformatu gabeko patruila batek gizonezko bat ikusi zuen Aita Vinuesa plazan edanda egotearen itxurak eginez. Gizonezkoa bertan zeuden pertsonengana hurbiltzen zen, haiek ohartu gabe gauzak lapurtzeko. Une batean, gizonezko bat oihuka hasi zen telefono mugikorra lapurtu ziotela esanez, eta susmagarria ihes egiten ahalegindu zen, beraz. Patruilak geldiarazi egin zuen gizonezkoa, eta hiru telefono mugikor eta emakume baten izenean zegoen kreditu-txartel bat aurkitu zizkioten.
Telefonoetako bat telefonoa lapurtu ziotela oihukatu zuen gizonezkoarena zen, eta beste telefonoetako bat eta kreditu-txartela goizaldeko ordu bat erdietan emakume bati aisialdiko lokal batean lapurtutakoak ziren. Beharrezko frogaketak egin ondoren, atxilotu egin zuten ebasketa-delitua leporatuta. Ertzaintza ikertzen ari da atzemandako hirugarren telefono mugikorra norena den jakiteko.
