Athleticek datorren asteartean (19: 00etan) hasiko du Lezaman aurtengo Erreginaren Kopa. Zuri-gorriek UDG Teneriferen aurka jokatuko dute final-zortzirenetan.
Azken hamarkadan, Erreginaren Kopako bi finaletara iristea lortu du Athleticek, biak Juan Luis Fuentes entrenatzaile zenean, 2012an eta 2014an. Lehenengoa Las Rozasen jokatu zen eta lehoiek luzapenean galdu zuten Espanyolen aurka (1-2), aurretik bi kanporaketa gainditu ondoren. 2014an, Ceutan jokatu zen finala, eta penaltietako txandak titulurik gabe utzi zituen zuri-gorriak.
Kopa jokatzen hasi zenetik (2002-2003 denboraldia) Athleticek jokatu dituen final bakarrak izan dira. Lehen zazpi edizioetan, lehoiek ez zituzten final laurdenak gainditu (lehenengo kanporaketa zen). 2004ko edizioan lau talde sailkatu ziren finalaurrekoetara eta Sabadellek kendu zion finalerako txartela. Athleticek ez du inoiz galdu final-zortzirenetan, baina bai final-laurdenetan, 11 aldiz hain zuzen ere. Azken urteetako bere txapelketarik onena 2018koa izan da, finalerdiak Bartzelonaren aurka galduta.
Guztira 38 partida jokatu ditu Erreginaren Kopan eta balantzeak argi uzten du, oraingoz behintzat, ez dela txapelketarik onena izan lehoientzat: 10 garaipen, 8 berdinketa eta 20 porrot.
