Ertzainek 26 urteko gizonezko bat arrastatu zuten atzo astelehena, lesio-delitu bat leporatuta. Erasoa joan den astean gertatu zen Irunen, gizonezko batek beste bat borra luzagarri batekin jo zuen eta zauriak eragiteaz gainera hainbat hortz hautsi zizkion.
Joan den asteazkenean, urtarrilaren 8an, gaueko hamarretan gertatu zen Irungo Mendibil auzoan. Ertzaintzak jasotako salaketaren arabera, biktima, gizonezkoa, lagun batekin kalean zegoela, ezagutzen zuen beste gizonezko bat ikusi zuen beregana hurbiltzen. Gizonezkoak borra luzagarri bat zeraman eskuan, eta, hitz-erdirik esan gabe, behin eta berriz jo zuen. Lehenengo kolpea aho parean jaso zuen, eta hiru hortz hautsi zizkion; bigarren kolpe batek zauria egin zion buruan, eta suturako hainbat puntu eman behar izan zizkioten Bidasoako eskualde-ospitalean. Biktimaren lagunak, bien tartean sartuta, erasotzaileak zaurituari eraso egiten jarraitzea eragotzi zuen.
Gertaera horretan oinarrituta, Ertzaintzak erasotzailea identifikatzeko eta gertaeraren inguruabarrak argitzeko dagokion ikerketa jarri zuen abian. Ustezko erasotzailea, 26 urtekoa, atzo aurkitu eta atxilotu zuten Irunen, lesio-delitu bat leporatuta. Behin polizia-izapideak amaitutakoan, arrastatua epailearen aurrera eraman dute gaur, asteazkena, goizean.
