Gaizka Garitanoren hitzetan “oso nagusi” izan den Athletic Clubek ezin izan du Vigoko RC Celtaren aurka irabazi San Mamesen jokatu den Ligako 20. jardunaldian. Entrenatzaile zuri-gorriak partidaren osteko prentsaurrekoan zehaztu bezala, “partida osoa egin dugu; izorratuta gaude: baloia oso ondo mugitu dugu, barruko jokoa izan dugu, errematea, irabazteko egin behar genuena egin dugu”. Garitanok, hala ere, lortutako puntuaren bertsio positiboarekin geratu nahi izan du: “Taldea ondo dago eta segurtasuna transmititzen du, horrek irabaztetik gertuago egotera garamatza galtzera baino”.
Kapitainari buruz galdetuta, Garitanok “ondo” ikusi du Iker Muniain, titular gisa berragertu eta Athleticekin bere 400. partida ofiziala jokatu duenean. “Nekatuta zegoen azkenean, baina freskotasuna falta zitzaion arren, une jakin batean zerbait ezberdina egiten dizun jokalaria da”.
Asteazkenean Elxen jokatuko duten Errege Kopako final-hamaseirenetako norgehiagokan zentratuta, egun horretarako egon daitezkeen txandakatzeen inguruan galdetu diotenean, Garitanok aitortu du, “aldaketa batzuk egin beharko ditugula, gero larunbatean jokatuko baitugu ordu batetan”.
