Barakaldok hiri osoan dauka jada zabor organikoa biltzeko zerbitzua. Arrontegi, San Bizente, Beurko, Lasesarre, Kareaga, Gorostiza, Errekatxo eta Kastrexana auzoek estreinatu dute zerbitzu hori, eta Bizkaiko Foru Aldundiaren dirulaguntza bati esker, 125 edukiontzi marroi gehiago daude hirian zehar banatuta.
Amaia del Campo Barakaldoko alkateak gaur goizean azaldu duenez, gaur sartu da indarrean Bide Garbiketa eta Hiri Hondakinen Bilketa kontratuaren aldaketa, edukiontzi marroiaren bilketa zerbitzua hiriaren egoera berrira egokitzeko osoko bilkuran onartutakoa. Horrela, barakaldarrek zerbitzu berri hau erabiltzen hasteko aukera izango dute Herritarren Arretarako Zerbitzuaren bulegoetan (Herriko Plaza, Clara Campoamor eta Gurutzeta) birziklatze-kita jasoz. «Maiatzean abian jarri genuen Bide Garbiketa eta Hiri Hondakinen Bilketa kontratu berriak bere berrikuntzen artean zuen edukiontzi marroiaren bilketa zerbitzua sartzea, eta lehen beste enpresa batek kudeatzen zuen; hortaz, zerbitzua eraginkorragoa da orain», adierazi du Del Campok.
Urtarriletik 125 edukiontzi marroi berri jarri dituzte auzo hauetan: Arrontegi, El Castañal, San Bizente, Beurko-Santa Teresa, Lasesarre, El Carmen, Kareaga, Gorostiza, Errekatxo, Zubileta eta Kastrexana.
«Erosketa hori Bizkaiko Foru Aldundiaren dirulaguntza bati esker egin ahal izan dugu, eta 80.000 euro eman dizkigu, azken ahalegin horretan inbertitu ditugun 115.760,70 euroetatik, zerbitzua hiri osoan egon dadin lortzeko», adierazi du Del Campok.
2015EAN HASITAKO APUSTUA
Edukiontzi marroia hirian zabaltzeko gobernu-taldeak 2015etik hartutako konpromisoa nabarmena izan da. Barakaldok 2013an zituen hasierako 23 edukiontzietatik, gaur egun hiriko auzo guztietan dauden 266 edukiontzietara iritsi gara.
