Iñigo Urkullu lehendakaria izan da gaur arratsaldean Zaldibarko jardueren jarraipena egiteko erakundeen arteko koordinazio-bileraren buru. Lehendakaritzan egindako bileran, Eusko Jaurlaritzako hainbat sailetako ordezkariak izan dira; zehazki, honako hauek: Iñaki Arriola Ingurumen, Lurralde Plangintza eta Etxebizitzako sailburua, Nekane Murga Osasuneko sailburua, Estefanía Beltrán de Heredia Segurtasuneko sailburua, Jon Azkue Laneko eta Gizarte Segurantzako sailburuordea, Elena Moreno Ingurumeneko sailburuordea eta Josu Zubiaga Segurtasuneko sailburuordea.
Halaber, Unai Rementeria Bizkaiko Ahaldun Nagusiak eta Imanol Pradales Bizkaiko Azpiegitura eta Lurralde Garapeneko diputatuak ere parte hartu dute, baita Jose Luis Maiztegi Zaldibarko alkateak, Juan Carlos Abascal Ermuko alkateak eta Miguel de los Toyos Eibarko alkateak ere.
