Barakaldoko Udalak beste hiru tailer jarri ditu martxan, mendekotasuna duten senideak zaintzen dituzten pertsonentzat. Mikel Antizar Gizarte Ekintza Arloko zinegotziak Barakaldo Zainduz programaren berri eman du gaur goizean. Mendekotasun-egoeran dauden adinekoak zaintzen dituzten familiei laguntzeko zerbitzua da, eta barne hartzen ditu prebentzio, informazio, orientazio, prestakuntza eta laguntza psikologiko arloetako jarduerak, «zaintza afektibo eta hurbila errazteko eta mendekotasuna duten adinekoak etxean mantentzen laguntzeko».
Programak laguntza psikologikoko 3 talde izango ditu. Talde horietan, harrera, euskarri-lana, erregulazio emozionala eta zaintza-lanaren azpian dauden elementuak ulertzeko eta horretaz jabetzeko lan psikohezitzailea egingo da. «Taldeek hamabostero egingo dituzte saioak, eta saio bakoitzak ordu eta erdi iraungo du», adierazi du Antizarrek.
Era berean, banakako arreta-saioak egingo dira unean uneko laguntzak eta emozio-euskarria emateko egoera kritikoen aurrean, dela bat-batean sortutako egoerengatik, dela zaintzailearen gainkarga bereziko uneengatik.
Barakaldo Zainduz mendetasun arriskuan edo egoeran dauden pertsonen zaintzaile ez-profesionalei zuzenduta dago, zaintzaile nagusiak izan edo ez, eta senideak izan edo ez. Nork bere burua zaintzeko edo zaintza-lanak egiteko laguntza behar duten zaintzaileak. Zaintza egiteko eta erantzunkidetasuna areagotzeko informazioa, orientazioa edo prestakuntza behar duten zaintzaileak. Ez dago adin mugarik. Zaindutako pertsonak edo zaintzaile nagusiak Barakaldoko udalerrian erroldatuta egotearen eta bertan egotearen baldintza bete behar du.
NORK BERE BURUA EZAGUTZEKO ETA LAGUNTZEKO TRESNAK
Laguntza-taldeetan modu egonkorrean parte hartzen ez duten zaintzaileei parte hartzeko aukera emate aldera, 3 tailer programatu dira urtean zehar. Horietako bakoitza 5 saioz osatuta egongo da eta saio bakoitzak bi orduko iraupena izango du; beraz, guztira 10 saio izango dira tailer bakoitzeko.
Landuko diren gaiak honako hauek izango dira: Norberaren burua genero-ikuspegitik zaintzea, gure ondoezak ulertzeko autoezagutza-tresnak eskuratzeko eta gure bizitzan hobeto sentitzen laguntzeko, genero-ikuspegitik; Dementziarekin moldatzen ikastea, narriadura kognitiboko egoeretarako teknikak ikasteko eta Nola zaindu neure burua beste norbait zaintzen dudan bitartean, emozioak kudeatzeko, besteekin hobeto komunikatzeko, beren beharrak identifikatzeko eta pertsonak berak behar duenari arreta emateko ezagutzak eta trebetasunak eskuratzeko.
Gainera, ikasturte honetan, Barakaldo-Sestao ESIko erizaintzako taldearekin lankidetzan, bi lan-saio egingo dira Zaintzaileei arreta integrala emateko, besteak beste, jarrera-higienea, mendekotasuna duten pertsonak mugitzea eta abar lantzeko.
Programa ezagutu eta parte hartu nahi dutenek izena eman edo informazioa eska dezakete 944789170 eta 944789344 telefonoetan, edo personasmayores@barakaldo.eus helbide elektronikora idatzita.
«Beste pertsona bat zaintzeak eskakizun fisiko eta psikologiko batzuk eskatzen ditu. Batzuetan, zaintzeko zereginean, eguneroko neketik eta tentsioetatik errekuperatzeko aukera ematen duten jarduerak alde batera uzten dira; mantentzen dituzten harreman propioak murrizten dira; atsedena ondasun desiratua baina urria bihurtzen da. Aisialdia, askotan, luxuzko objektu bihurtzen da. Horregatik, gobernu taldean argi daukagu ezin ditugula alde batera utzi zaintzan aritzen diren pertsonak «, adierazi du Antizarrek.
Barakaldon, 1.685 pertsonak jasotzen dute familia-inguruneko zaintzagatiko prestazio ekonomikoa.
