Justizia eta bakea sustatzeko unibertsitatearen eragina —GIHen 16. helburua— analizatzeko THE-Times Higher Education erakundeak antolatutako The University Impact Forum izeneko foroaren amaiera-ekitaldian izan da Iñigo Urkullu lehendakaria. Deustuko Unibertsitatean egin den ekitaldi honetan, Lehendakariak Giza Garapen Iraunkorraren ereduarekiko eta gure ondokoei mundu hobea uzteko bere konpromisoa erakutsi du. “Helburu hauengatik merezi du elkarrekin lanean jarraitzea”, adierazi du.
Times Higher Education-ek eta Deustuko Unibertsitateak, aste honetako ostegunean, hilak 20, eta ostiralean, hilak 21, «Peace and Justice: a common quest for universities, governments and civil society» foroa burutu dute, NBEren 2030 agendaren Garapen Iraunkorreko Helburuak lortzeko Unibertsitateen ekarpenaren esparruan. Kasu honetan, GIHen 16ri arreta berezia emanez: “Bakea, Justizia eta Erakunde solidarioak”.
Amaiera-ekitaldian, Lehendakariak azpimarratu du Euskadirentzako aukera ona dela bake-, segurtasun- eta gobernantza-politikak esparru aldeaniztun batean kokatzeko. Horren haritik, ekarpen guztiak garrantzitsuak direla adierazi du: Administrazio publikoa, Unibertsitatea eta gizarte zibileko erakundeak. “Eusko Jaurlaritza, Foru Aldundiak eta Udalak, enpresa-, gizarte- eta hezkuntza-arloekin batera, indarrak batzen ari gara 2030 Agenda honetan urratsak emateko”, adierazi du.
Halaber, bere hitzaldian, Europako Batzordeak eta ELGEk duela gutxi aurkeztutako bi txosten estrategikoak aipatu ditu Lehendakariak. Txosten horietan Euskadi lurralde aitzindaria dela aipatzen da, 2018ko apirilean onartutako “Euskadi Basque Country 2030 Agenda” abian jarri izanari esker.
