«EAEko bezero omnikanalen ohiturak» azterlanak Euskadin online erosten duten pertsonen jokaera aztertu du.
Euskadiko 10 pertsonatik 8k erabiltzen dute Internet; horietatik % 50ek Internet bidezko erosketak egiten dituzte, eta % 44,8, berriz, kanal anitzeko bezeroak dira.
Sonia Pérez Ezquerra Turismo, Merkataritza eta Kontsumoko sailburuak “Omnicanalidad: retos para el comercio y el consumo” jardunaldia inauguratu du, Sailak eta Kontsumobidek antolatuta, online kontsumitzaileen jokaeraz bigarren azterlan bat egin ondoren (2018koa zabalduz). Aurkezpenean, Olga Santamaria Kontsumobideko zuzendaria eta Felix Gorospe Ikeiko zuzendaria izan ditu aldean.
Geroko jardunaldian, parte hartu dute, halaber, Laureano Turienzo, Espainiako Retail Elkartekoa, eta Isabel Muela, Turismo eta Merkataritzako sailburuordea, hauxe eztabaidatzeko: merkataritza elektronikoko gorabeherak, merkataritzan eta kontsumoan hark nolako eragina duen eta administrazioek digitalizazioan zer-nolako rola duten.
Sailburuak azaldu du kanal-aniztasunak kanal-orotasunari ireki diola bidea komunikazio-eredua eta bezeroekiko esperientzia hobetzeko orduan, bezeroei modua ematen baitie saltokiarekin kanal guztien bitartez aldi berean eta etengabe harremanetan egoteko.
“Azterlaneko datuek adierazten dute Euskadin bizi diren 10 pertsonatik 8k erabiltzen dutela Internet; haietako % 50ek Internet bidezko erosketak egiten dituzten arren, bakarrik % 44,8 dira kanal anitzeko bezeroak”, azaldu du.
Gainera, azterlan honek kanal orotako hiru bezero-tipologia identifikatu ditu, haien sarpen mailaren arabera:
- Oinarrizko Maila. Informazioa aurrez aurre zein digitalki bilatzen dute, baina erosi eta itzuli aurrez aurre egiten dute. Hauek dira gehienak (% 44), eta adin zaharrenekoak.
- Bitarteko Maila. Aurrez aurre zein digitalki bilatu eta erosten dute, baina bakarrik aurrez aurre itzultzen dute (% 42).
- Maila Aurreratua. % 14 dira (bilatu, erosi eta itzuli bi kanalak erabiliz egiten dute, bereizi gabe). Talde honetan gizon gehiago daude emakumeak baino, eta bereziki gazteak dira.
Halaber, azterlanak erosketa-ibilbideak aztertu ditu, kontuan hartuz erosi aurrekoa, erosketa eta erosi ondokoa. Erosi aurretik, bezeroek gehiago eskuratzen dute informazioa webguneetan eta saltoki fisikoetan, sare sozialetan baino. Aldiz, erostean, kanal digitala eta fisikoa biak baliatzen dituzte. Nolanahi ere, hala bilaketan nola erosketan, gehiago erabiltzen da kanal digitala aurreko urtea baino.
Sailburuak, hain zuzen, erosi ondokoa nabarmendu nahi izan du; izan ere, Interneten bidez erosten duten pertsonen % 45ek produktuak itzuli ohi dituzte: zehazki, % 44,8k azken urte honetan zerbait itzuli dutela diote; bada, batez ere gazteek (18-35) itzultzen dituzten produktuak.
“Hemen, administrazioei deitu nahi diegu tokiko merkataritza sentsibilizatuz eta bultzatuz erantzukizunez joka dezaten, digitalizazio- eta modernizazio-prozesuak bultzatzearen bidez, baina baita herritar kontsumitzaileei ere”, ekarri du gogora Sailburuak.
“Itzulera tasa altu horrek kanal orotako bezero baten gogobetetze maila ere adierazten du kasu askotan. Ez da galdu behar hurbiltasun, lotura eta arreta pertsonalizatu hori. Jabetzen gara kanal-orotasuna errealitate bat dela, gehiagora joango dena, eta saltokiak horretara egokitu behar direla. Aldiz, ezin dugu alde batera utzi gure rola eta kontsumitzaile-erantzukizuna gure etorkizuna eraikitzeko orduan. Gure erosketa-erabakien bidez aukeratzen dugu zein gizartetan bizi nahi dugun”.
