Ertzainek 31 urteko gizon bat eta 32 urteko emakume bat atxilotu zituzten joan den astelehenean Gasteizen, bertako etxebizitza bateko trastelekutik sei tronpeta, patinete elektriko bat eta ume-kotxe bat lapurtzea leporatuta. Lapurtutakoaren balioa 15.000 euro ingurukoa da.
Apirilaren 27an partikular batek salaketa jarri zuen Ertzaintzaren egoitzan Gasteizko etxebizitza bateko trastelekuan egindako lapurreta batengatik. Dirudienez, lapurreta hainbat egun lehenago egin zuten, eta sei tronpeta, patinete elektriko bat eta haur-kotxe bat lapurtu zituzten, balio osoa 15.000 euro ingurukoa izanik.
Maiatzaren erdialdera, Ertzaintzak jakin zuen bigarren eskuko objektuak erosteko web-orri batean gizonezko batek bi tronpeta zituela salgai, eta lapurtutako instrumentuak izan zitezkeela susmatuta, jabea ustezko saltzailearekin harremanetan jarri zen erosteko asmoz, eta argazkiak bidaltzeko esan zion.
Jabeak egiaztatu zuen tronpetak lapurtutakoetako batzuk zirela eta joan den astelehenean ordu bat eta erdiak aldera jarri zuen hitzordua gizonarekin Gasteizko plaza batean elkartzeko.
Egun horretan ertzainak aipatutako lekutik hurbil kokatu ziren ustezko salmenta zaintzeko eta instrumentuen jatorria egiaztatzeko.
Halako batean emakume bat agertu zen bi tronpeta eta beste biren piezak zituzten bi maletatxorekin, eta ertzainek horien jatorriaren berri galdetzean ez zuenez erantzun sinesgarri bat ematen jakin, atxilotu egin zuten.
Handik minutu batzuetara agertu zen bertara gizon bat, emakumearen bikotekidea, eta atxilotu egin zuten lapurreta-delitua leporatuta, berak ere ez baitzuen objektuen jatorriari buruzko azalpenik eman.
Joan den asteartean egiaztatu zuen salatzaileak atzemandako objektuak bere trastelekutik lapurtutakoak zirela, eta itzuli egin zitzaizkion, beraz.
Atxilotuetako batek polizia-aurrekariak ditu, eta biek laster agertu beharko dute epailearen aurrera.
