Gipuzkoako hiriburuko Udalak bizikleten erabiltzaileei gogorarazten die berariaz horretarako prestatutako tokietan aparkatu behar direla. Kostako lerroko barandetan edo eremu publikoko beste elementu batzuetan aparkatutako bizikletak kendu eta udal altxatokira eramanen dira, dagokien isunarekin. Halaber, neurriak hartuko dira bidearen gainerako erabiltzaileen segurtasun fisikorako arriskua dakarten edo oinezkoen edo txirrindularien joan-etorria oztopa dezaketen egoeretan.
Udalak eskerrak eman nahi dizkie herritarrei bizikleta garraiobide gisa erabiltzeko egiten ari den ahaleginagatik eta egiten ari den apustuagatik. Hori dela eta, Pilar Arana Mugikortasuneko zinegotziak gogorarazi die erabiltzaileei “Donostiak 8.250 plaza inguru dituela bizikletentzat hirian. Horien artean, bi aparkaleku seguru autobus-geltokian, 110 plazarekin, eta Amaran, Pio XIIan, 50 plazarekin”.
Udan Donostiako hondartzen inguruan bizikletak gehiago aparkatzen direnez, Udalak dei egiten die erabiltzaileei arduraz joka dezaten eta garraiobide horretarako diren aparkalekuak erabil ditzaten.
Gainera, datozen asteetan, Mugikortasun Departamentuak bizikletentzako aldi baterako plaza berriak jarriko ditu hondartza inguruetan, eremu horietan aparkatzea errazteko.
