Bizkaiko Foru Aldundiak bultzatutako www.museoeneguna.eus webguneak hartzen duen erakusketa birtuala ekaina osoan zehar egongo da ikusgai; hilabete horretan, halaber, Bizkaiko ia museo guztiek irekiko dituzte ateak. Plataforma hori Bizkaiko Foru Aldundiak jarri du martxan, lurraldeko 34 museorekin batera, eta maiatzaren 18tik, Museoen Nazioarteko Egunetik, dago ikusgai. Online, klik batekin museo bakoitzeko pieza bat xehetasunez ezagutu daiteke eta hogeita hamar artelan baino gehiago daude herritarren eskura. Orain, eta museoen irekiera babesteko asmoz, Bizkaiko museoek publikoarentzat irekiko dituzten egunei buruzko informazioa sartzea erabaki du Foru Erakundeak.
Ekimen honen bidez Foru Erakundeak museoekin bat egin du normaltasun berrira itzultzen lagunduz, herritarrei beren jardueraren berri ematea erraztuko dien plataforma hau bezalako aholkularitza eta tresnak eskainiz.
Bizkaiko museo-espazioek ahalegin handia egin dute euren instalazioak eta jarduerak egokitzeko eta bisitariari espazio seguruak eskaini ahal izateko, bai eta eskaintzaren zati handi bat kalitate- eta erakargarritasun-estandar berberekin mantentzeko ere.
Museoen irekierari buruzko informazioa eskuratzeaz gain, www.museoeneguna.eus plataformaren bidez bisitariak ibilbide birtualez, bideoez eta museo bakoitzak aukeratutako piezen argazkiez gozatzen jarraitu ahal izango du. Horietako bakoitzari buruzko oinarrizko informazioa eta azalpen-testu labur bat daude.
