Kultura eta Hizkuntza Politika Sailak 560.000 euroko partida bat onartu du sorkuntza lantegiak bultzatzeko, sorgune izeneko laguntza deialdiaren bidez. Laguntza-lerro honen helburua da sorkuntza-praktikak bultzatzen dituzten kultura-gune independenteen programak babestea. Iaz sei proiektu diruz lagundu ziren deialdi honen bidez.
Sorguneei zuzendutako deialdiaren helburua beren sormen-lana garatzen laguntzea da, «arte-adierazpenen berrikuntza, talentuaren babesa, kudeaketa parte-hartzailea eta tokiko ingurunearekiko harremana bideratuz». Jarduera-proiektu horiek kultura- edo sormen-sektoreren batean kokatuta egon beharko dute (ikusizko arteak, zinema eta ikus-entzunezkoak, dantza, literatura, musika, antzerkia…). Hautatutako proiektu bakoitzari gehienez 120.000 euro emango zaizkio, eta gehienez ere aurrekontuaren % 70.
Iaz, sei sormen-gune babestu ziren laguntza-deialdi honen bidez, 51.983 eta 120.000 euro bitarteko laguntzekin. Honako hauek izan ziren laguntzak jaso zituzten kultura-guneak: Wikitoki Elkartearen laborategia, Bulegoa z/b, Arropaineko Arragua, baratza, Fab Lab Bilbao eta Haztegia.
Sorkuntza-lantegietarako deialdi horrez gain, Eusko Jaurlaritzak urtero Bitartez deialdia jartzen du martxan, iaz 500.000 euroko aurrekontua izan zuena. Bitartez deialdiaren helburua da talentuaren sustapena bultzatzea, “harreman- eta bitartekaritza-bide berriak sortzea hainbat publikorekin harremanetan jartzeko, elkarrekin sortzea eta hibridazioa bultzatzea, sormen-potentziala bultzatzeko edo kultur jardunbideetatik kultura eta gizartea berritzeko estrategiak planteatzen dituzten ekimenak garatzeko”.
