Europako Batzordeak Euskal Herriko Unibertsitateak parte hartzen duen ENLIGHT unibertsitateen sareak aurkeztutako proiektua hautatu du Erasmus + deialdian.
Proiektuak 120 milioi euroko zuzkidura du, eta hautatutako proiektu bakoitzari 5 milioi euroko aurrekontua esleitzen dio, datozen 3 urteetan inbertitu beharreko aurrekontua.
ENLIGHT proiektuak ikerkuntzan erreferente diren eta ospe aitortua duten 9 unibertsitate biltzen ditu: Ganteko Unibertsitatea (Belgika), Bordeleko Unibertsitatea (Frantzia), Bratislavako Comenius Unibertsitatea (Eslovakia), Irlandako Galway Unibertsitate Nazionala (Irlanda), Gotingako Unibertsitatea (Alemania), Groningako Unibertsitatea (Holanda), Tartuko Unibertsitatea (Estonia), Upsalako Unibertsitatea (Suedia) eta Universidad del País Vasco/Euskal Herriko Unibertsitatea (Euskal Herria). Joan den urriaren 29an formalki sortu zen unibertsitateen partzuergoa Estoniako Tartu hirian, Erasmus + deialdira aurkezteko helburuarekin, eta deialdiaren ebazpena gaur bertan eman da argitara. Guztira Europako 12 hiritako 312.500 ikasleko kidegoa biltzen du, guztira 2.015.371 biztanleko eremua; edo 5.722.554 biztanleko eremua, metropoli eremu zabalenak kontuan hartzen baditugu. Sareak 250.000 biztanletik gorako hainbat hiri ordezkatzen ditu, ia milioi bat pertsona dituen metropoli eremuz inguratuta, baita 100.000 biztanletik beherako beste hiri txikiago batzuk ere, landa guneez inguratuta. Aniztasun geografiko aberats horrek Europako eskualde guztiak biltzen ditu (iparralde-hegoalde-ekialde-mendebalde, kostaldeak eta eremu kontinentalak barne), eta bere hizkuntza aniztasuna (11 hizkuntza) ENLIGHT proiektuaren aktibo handienetako bat da.
ENLIGHT proiektuak Europako unibertsitateen arteko aliantza bat eraikitzea dakar, eta helburu nagusitzat du bizi kalitate bidezkoa, jasangarritasuna eta konpromiso globala sustatzea, goi-mailako hezkuntza eraldatzen joan ahala. ENLIGHT proiektuak premisa hau du abiapuntu, hots, goi-mailako hezkuntza erakundeek zeregin garrantzitsua dutela gure gizarteak bizitzen ari diren eraldaketa handiak bultzatzeko orduan: trantsizio ekologikoa, demografikoa eta digitala. Proiektuak ezagutza, trebetasunak eta gaitasunak sortzea proposatzen du, bai eta kide dituen unibertsitateek hezkuntza berritzeko duten ahalmena hedatzea ere, Europako ikasleak globalki konprometituta dauden herritarrak izan daitezen, eta, aldi berean, pertsonen arteko ekitatea eta planetaren jasangarritasuna sustatzeko gai.
ENLIGHT proiektua osatzen duten unibertsitateen prestakuntza, ikerketa eta berrikuntza esparruetako agenda partekatua bost erronka enblematikotan oinarritzen da. Erronka horiek guztiak erabakigarriak dira gizarte ongizatea eta etorkizuneko jasangarritasuna sustatzeko, eta Nazio Batuen garapen jasangarriko 17 helburuetatik 10etan gutxienez eragiten dute. Bost erronka enblematiko horiek honako hauek dira: osasuna eta ongizatea; iraultza digitala eta digitalizazioaren eragina; klima aldaketa; energiaren erabilera eta ekonomia zirkularra; eta ekitatea.
Deialdian, Europako unibertsitateek aurkeztutako 64 eskaeretatik 24 proiektu hautatu dira, eta 32 herrialdetako goi-mailako hezkuntzako 380 erakundetik gora hartu dute parte (EBko 26 estatu kide – denak Malta izan ezik –, Erasmus + programako beste bost herrialde eta Erresuma Batua). Gainera, 120 milioi euroko finantzaketa duen deialdian, Espainiako 34 unibertsitatek parte hartu dute, lehen deialdian parte hartu zuten beste 33ri gehituta. Alemania (46) nagusitu da, ondoren Frantzia (38) eta laugarren postuan, Espainiaren ondoren, Italia (29).
UPV/EHUren errektore Nekane Balluerkaren iritziz: «duela urtebete baino gutxiago sortutako unibertsitate partzuergo honek bete-betean asmatu du bere eginkizunean, gaur berretsi ahal izan den bezala. Batzordeak Europako Unibertsitatearen gure eredua aitortzeak aukera handiak eskaintzen ditu gure irakaskuntzaren, gure ikerketaren eta gure transferentziaren lankidetza akademikoa eta proiekziora egin ahal izateko. Ikasleei dagokienez, ENLIGHT proiektuak, besteak beste, erronketan oinarritutako ikaskuntza ibilbide malguak, nazioarteko eta tokiko hainbat eragilerekin etengabeko elkarreragina eta nazioarteko mugikortasun modu berriak bultzatuko ditu. Laster, ekimen zehatzak abian jarriko direla iragarri ahal izango dugu, aliantza honetan inplikatutako bederatzi unibertsitateen elkarlanaren ondorioz «.
