Ertzaintzak, Errenteriako Udaltzaingoaren laguntzaz, bi gazte atxilotu ditu goizaldean bertako erdiguneko harategi batean indarra erabiliz lapurreta egiten ahalegintzea leporatuta.
Gaur goizaldeko lauak aldera, Errenteriako erdigunean patruila-lanetan ari zen Ertzaintzako polizia-baliabide batek metal hotsa entzun du inguruko kale batean. Hotsa nondik zetorren egiaztatzera hurbildu direnean, agenteek ikusi dute bizilagun bat harategi bateko pertsiana behartu nahian ari ziren bi pertsonari oihuka ari zela eta bi pertsona horiek kalean behera korrika abiatu direla norabide ezberdinetan.
Horren aurrean, agenteak bi gazteen atzetik abiatu dira, eta udaltzaingoei eta lankideei eman diete gertatutakoaren berri. Handik laster harrapatu du bat Ertzaintzaren patruila batek, eta bigarrena, berriz, Udaltzaingoaren baliabide batek atzeman du beste norabide batean ihesi zihoala. Bi gazteak, 25 eta 34 urtekoak, indarra erabiliz lapurreta egitea leporatuta atxilotu dituzte. Bestalde, Ertzaintza ikertzen ari da arrastatuek parte hartu ote duten ?modus operandi? bera erabiliz inguruko bi merkataritza-lokaletan egindako lapurretetan.
Bi arrastatuek dituzte polizia-aurrekariak, eta datozen orduotan eramango dituzte epailearen aurrera.
