Donostiako Udalak bi desfibriladore berri instalatu ditu geolokalizatzailearekin. Bat Igeldon kokatu da, eta bestea Artikutzako finkan. Horrela, hiri kardiobaskularraren mapa osatu du.
Enrique Ramos Osasun Publikoko zinegotziak adierazi duenez, «Igeldon bi desfibriladore zeuden, bata jolas-parkean eta bestea kanpinean, baina komenigarritzat jo genuen auzoko hirigunetik hurbilago dagoen bat, eta, beraz, Igeldoko plazan jarri da. Artikutzaren kasuan, egokitzat jo dugu instalatzea, leku isolatua delako eta bisita asko izaten dituelako».
Ramosen esanetan, «Desfibriladore gehienak zentro publikoetan (kiroldegiak, udal bulegoak, kultur etxeak) edo merkataritza guneetan daude, besteak beste. Ia 150 aparatu daude Donostian, hau da, 1.000 biztanleko 0,77. Horrek esan nahi du ia hirukoiztu egiten dugula Espainiako estaldura-tasa». Dauden desfibriladoreei, gainera, gure hirian lan egiten duten Osakidetzaren bizi-euskarriko unitate mugikorretan nahitaezkoak direnak gehitu behar zaizkie.
Kontuan izan behar da deskarga elektrikoa aplikatzeko denbora geldialdiaren ondorengo 3-5 minutuen barruan egon behar dela, biziraupen-tasa onargarria izateko eta konplikazio larririk ez izateko. Desfibrilazio goiztiarrak % 70eraino areagotu ditzake bihotz-biriketako geldialdi batean bizirauteko aukerak.
