Ertzainek 25 urteko emakume bat atxilotu zuten atzo, astelehena, arratsaldean, Donostiako Antiguo-Bentaberri auzoko laguntza-zentro batean ustez lapurreta egitea leporatuta. Emakumea zentroko langileek harrapatu zuten langile bati lapurtutako oinetakoak jantzita zeramatzala, eta, gainera, langile horri aldageletatik lapurtutako arropa zeraman poltsa batean. Ertzaintzak uztailean egindako beste lau lapurreta leporatu dizkio atxilotu duten emakumeari, bideo-grabazioak ikusi ondoren erizain-uniformea jantzita zentroko eremu pribatuetan sartzen identifikatu ahal izan baitzuen.
Atzo arratsaldeko ordu biak baino lehentxeago, herritarren segurtasunerako patruila baten laguntza eskatu zuten Donostiako Antiguo-Bentaberri auzoko laguntza-zentro batetik, harrerako langileek zentroko langileen aldageletan lapurreta egitera sartu zen emakume bat baitzuten atxikita.
Adierazitako lekura hurbildu ziren agenteak zentroko langile batekin harremanetan jarri ziren, eta honek ertzainei esan zien emakumea ezagutu zuela uztailean behin baino gehiagotan egin zuelako lapurreta zentroan. Jarraian, ertzainek zentroko aldageletako batean identifikatu zuten emakumea. Une horretan, zentroko langileetako bat hurbildu zitzaien agenteei, eta esan zien aldageletako armairutik prakak, kamiseta bat, bi maskara, oinetakoak eta aterki bat lapurtu zizkiotela. Objektu horiek akusatuaren poltsan aurkitu zituzten agenteek, eta langileari lapurtutako oinetakoak, berriz, jantzita zeramatzan. Bestalde, poltsa barruan ustez lapurtutakoak ziren beste hainbat gauza ere aurkitu zizkioten, hala nola hainbat kamiseta, bi erloju, belarritakoak eta diru-zorro bat. Horregatik guztiagatik, agenteek atxilotu egin zuten 25 urteko emakumea, indarkeria erabiliz lapurreta egiteagatik eta ebasketengatik aurrekari ugari dituena, indarra erabiliz lapurreta egitea leporatuta.
Ertzaintzak gero uztailean egindako beste lau lapurreta leporatu dizkio atxilotu duten emakumeari, bideo-grabazioak ikusi ondoren inor ohartu ez zedin erizain-uniformea jantzita zentroko eremu pribatuetan sartzen identifikatu ahal izan baitzuten. Egun horietan, zentroko langileek salatu zuten hainbat objektu lapurtu zituztela, besteak beste ordenagailu eramangarri bat.
Atxilotua datozen orduotan eramango dute epailearen aurrera, beharrezko polizia-eginbideak amaitutakoan.
