Atzo goizaldean ertzainek 24, 31 eta 42 urteko hiru pertsona atxilotu zituzten Basaurin, indarra erabiliz etxebizitza batean lapurreta egitea leporatuta. Arrastatutako gizonak etxe batean sartu ziren fatxadan gora igota, ustez lapurreta egiteko asmoz, etxebizitzaren jabeak oporretan daudela aprobetxatuz.
Goizaldeko ordu biak aldera, berriemaile batek Ertzaintzara deitu du pertsona bat Basauriko Bidasoa Ibaia kaleko etxe baten fatxadan gora igo eta etxebizitza bateko balkoian sartu dela esanez. Berriemailearen arabera, beste hainbat pertsona kalean geratu dira zelatan, eta dirudienez lapurreta egiteko asmotan zebiltzan.
Ertzaintzaren bi patruila berehala hurbildu dira adierazitako lekura. Bertara iritsi direnean, agenteek ikusi ahal izan dute bi pertsona fatxadan gora igo eta lehenengo solairuko etxebizitza batean sartu direla leihotik. Bien bitartean, hirugarren gizonezko bat portalean zegoen zelatan, eta patruila ikusi duenean korrika hasi da, nahiz eta ez duen ihes egitea lortu agenteetako batek harrapatu duenez.
Etxebizitzan sartu diren bi pertsonei kalera jaisteko eskatu diete agenteek, eta hauek ezetz esan diete. Handik laster, ertzainek eskailera bat jarri dute adierazitako etxebizitzako balkoira iristeko. Mugimendu hori ikusita, ustezko bi lapurrek kalera jaistea erabaki dute, eta bertan atzeman dituzte agenteek.
Era berean, bi ertzain eskaileratik iritsi dira etxebizitzara, eta, barrura sartu ahal izateko, leiho bat eta pertsiana behartuta zeudela egiaztatu dute. Agenteek lapurreta egin izanaren zantzu argiak aurkitu dituzte etxean, dena hankaz gora baitzegoen eta armairuak irekita, tiraderak lurrean botata eta hainbat gauza oheetan zabalduta aurkitu baitituzte.
Horregatik guztiagatik, ertzainek identifikatu egin dituzte hiru gizonezkoak, 24, 31 eta 42 urtekoak, eta, beharrezko egiaztapenak egin ondoren, indarra erabiliz etxebizitza batean lapurreta egitea leporatuta atxilotu dituzte.
