Ertzaintzak bi pertsona atxilotu zituen atzo arratsean Bilbon eta Barakaldon lapurreta egiteagatik. Bilbon arrastatu zuten gizonak supermerkatu batean egin zuen lapurreta eta, gainera, bi langile jo zituen; Sestaoko biktima emakume bat izan zen, eta atxilotu zuten gizonak urrezko kate bat kendu zion tira eginda.
Lehenengo gizonezkoa atzo arratsaldeko ordu biak aldera atxilotu zuten Barakaldon. Biktima Foruen pasealekutik bikotekidearekin oinez zihoala, gizonezko bat hurbildu zitzaion eta lepoan zeraman urrezko katea kendu zion tira eginda, eta, ondoren, korrika ihes egin zuen. Bikotekideak eta beste oinezko batek harrapatu zuten lapurra, eta Ertzaintzaren patruila bat iritsi arte atxiki zuten. Agenteek indarkeria erabiliz lapurreta egiteagatik atxilotu zuten.
Handik ordu batzuetara, gaueko bederatziak aldera, Ertzaintzak jakin zuen indarkeria erabiliz lapurreta egin zutela Bilboko Iturribide kaleko supermerkatu batean. Salatzailearen arabera, gazte bat motxilan zeramatzan gauzak ordaindu gabe supermerkatutik irteten saiatu zen, eta, gainera, atxikitzen ahalegindu ziren bi langile jo zituen. Adierazitako lekura hurbildu ziren agenteak ustezko lapurraren kargu egin ziren, eta, mendean hartu ondoren, indarkeria erabiliz lapurreta egiteagatik atxilotuta eraman zuten polizia-egoitzara. Gazteak, 19 urtekoak, polizia-aurrekari ugari ditu.
