Barakaldok kaleko antzerkiaz gozatu ahal izango du berriro Eskulturen plazan. UdanBai! Udako programazioak izan duen erantzun eta funtzionamendu onaren ondoren, Barakaldoko Udalak Rataplan kultur programa berreskuratzearen aldeko apustua egin du, kaleko antzerkia jende guztiarengana hurbiltzen baitu. Ekimen honen laugarren edizioa izango da aurtengoa, normalean Karmenetako egitarauaren parte dena, baina Covid-19aren ondorioz atzeratu egin behar izan zena.
Oraingo honetan, antzerki-aste oso bat programatu da, hilaren 14an (astelehena) hasi eta 20an (igandea) amaituko dena. Egunero antzeztuko da 19: 30ean, hilaren 18an (ostirala) izan ezik; orduan, herritarrek bigarren ikuskizun bat ikusteko aukera izango baitute 23:00etan.
Covid-19ren egoera dela eta, Udalak jendearentzako edukiera mugatu behar izan du, bertaratutakoen segurtasuna bermatzeko. Horrela, gehienezko edukiera 200 lagunera mugatuko da, eta datorren astelehenetik, irailak 7, ikuskizun bakoitzerako gonbidapena jaso beharko da Eskulturen parkean. «Horrela, Barakaldoko kale antzerkiarekin topo egin dezakegu, modu seguruan», adierazi du Jonathan Martin Gazteria zinegotziak.
Rataplanen edizio berria 8 konpainiaren lanekin dator, gehienak bertakoak, baina baita Kataluniatik, Andaluziatik edo Nafarroatik iritsitakoak ere.
Astelehenean, hilaren 14an, altxatuko da oihala , Hutsun + Ortziren Urbasa lanarekin, eta asteartean, berriz, Nudo (Rojo Telón Cía) lanarekin jarraituko dute. Asteazkenean, hilak 16, Yes, We Art! Izango da ikusgai, Gag Street Boysen eskutik. Ostegunean, hilaren 17an, Rock Cirk helduko da, Rolabola konpainia andaluziarrarekin.
Ostirala berezia izango da, bi saio programatu direlako. 19:30ean, Amico Teatro/Danza konpainiaren Amigo, on the Beach filma izango da ikusgai. 23:00etan hasiko da Lubbert, Inda Pereda konpainiarekin.
Larunbatean, hilaren 19an, Sesencial ikuskizunaz gozatzeko aukera izango da, Vaivén Circo konpainiaren eskutik. Igandean, hilak 20, Rataplan saioa amaituko da, Hika Teatroa konpainiaren Tonbola lanarekin.
«Kulturaren aldeko apustua egiten jarraitzen du Udalak, eta dena prest dugu astebetez kale antzerkirik onenaz gozatzeko. Beraz, herritarrak animatu nahi ditut Eskulturen plazaraino hurbildu, gonbidapena jaso eta kalean, zerupean, jarduera seguru batez gozatzera», adierazi du Martínek.
