Ertzainek 19, 23 eta 25 urteko hiru gizonezko atxilotu dituzte goizaldean Bizkaiko hiriburuan, indarra erabiliz lapurreta egitea leporatuta. Hiru susmagarriek Kirikiño Etorbidean aparkatuta zegoen auto baten leihoetako bat hautsi eta hainbat gauza lapurtu dituzte, eta horietako batzuk handik laster berreskuratu dituzte.ç
Goizaldeko ordu bat eta erdiak aldera, Ertzaintzari jakinarazi diote hiru pertsonak Kirikiño Etorbidean aparkatuta zegoen auto bat behartu dutela, eta barruan sartu eta miatu egin dutela, itxura denez lapurreta egiteko asmoz.
Adierazitako lekura hainbat patruila hurbildu dira, eta batzuk autoa zegoen lekura hurbildu diren bitartean, beste batzuk inguruak miatzen hasi dira susmagarrien bila, berriemaileak Ertzaintzari jakinarazi baitio susmagarriak Eskurtze auzo aldera joan direla.
Horrela, patruila horietako batek aurkitu eta geldiarazi ditu hiru susmagarriak Padurako Guduaren kalean oinez zihoazela. Hiru gazteak, 19, 23 eta 25 urtekoak, identifikatu ondoren, agenteak konturatu dira horietako bik odol-arrastoak zituztela eskuetan eta kristal-zatiak oinetakoetan.
Ustez lapurreta egiteko behartu duten autora hurbildu den patruilak, bestalde, jakitera eman du odol-arrastoak zeudela bertan, eta horren arabera lapurreta egin duenak zauriren bat egingo zuela leihoko kristala haustean.
Era berean, autoaren jabea aurkitu ondoren, hau autoa zegoen lekura hurbildu da eta, autoa aztertu ostean, aipatu du hainbat objektu falta zirela, besteak beste, mendiko oinetako batzuk, hainbat txartel zituen poltsa bat eta eguzkitako betaurrekoak. Horrela, susmagarriekin zeuden agenteek egiaztatu dute haietako batek zuen plastikozko poltsa batean hainbat betaurreko pare zeudela, eta beste batek zeraman poltsan, berriz, mendiko oinetakoak. Jabeak gero egiaztatu du gauza horiek guztiak autotik lapurtu dituztela.
Horregatik guztiagatik, ertzainek atxilotu egin dituzte hiru susmagarriak, indarra erabiliz lapurreta egitea leporatuta, eta polizia-egoitzara eraman dituzte.
