Juan Antonio Pizarrok zuzentzen duen Barakaldoko Udaleko Enplegu, Gizarte-kohesio eta Aniztasunaren Kudeaketa Arloak, Udaleko Immigrazio Zerbitzuaren bidez koordinatuta, Zurrumurruen Aurkako Oinarrizko Prestakuntzako lau jarduera antolatu ditu hilabete honetan. Lantegiak Clara Campoamor Zentro Zibikoan izango dira 18:00etatik 20:00etara, eta beharrezko osasun-neurriak hartuko dira Covid-19aren kutsadurari aurrea hartzeko .
Lehen tailerrean, Xabier Aierdi EHUko Soziologian doktorea izango da protagonista, eta irailaren 21ean, astelehenean, ‘Migrazio prozesuak: zurrumurruak, pertzepzioak eta jarrerak’ izango ditu hizpide. Asteazkenean, hilaren 23an, Andrea Ruiz Balzola Deustuko Unibertsitateko Antropologian doktorearen txanda izango da, ‘Kultura, arraza eta nortasuna’ kategorien eraikuntza kulturala azaltzeko. Azkenik, astelehenean, hilak 28, eta asteazkenean, hilak 30, Asier Gallastegi aholkulari eta coach-ak ‘Elkarrizketa eta komunikaziorako trebetasun praktikoak i eta II’ tailerra eskainiko du.
Izena aurrez eman behar da, amekadi@gmail.com helbidera mezu elektroniko bat bidaliz edo 670 745 032 telefonora deituz.
Pizarrok gogora ekarri duenez, abenduaz geroztik zurrumurruen aurkako euskal sarearen (zas) parte da Barakaldo, eta bertan daude ordezkatuta Euskadiko erakunde nagusiak, hala nola, hiru foru aldundiak, Eusko Jaurlaritza eta Bilboko, Donostiako, Gasteizko, Getxoko, Portugaleteko eta Zarauzko udalak, besteak beste.
Sarean zurrumurruen aurkako prestakuntza-tailerrak, antzerkiari eta ikus-entzunezkoei buruzko tailer tematiko espezifikoak eta material didaktikoak eta sentsibilizazio- eta literatura-materialak sustatzen dira, besteak beste. Helburua da gizarteko arlo guztiak barneratzea eta, horrela, modu integralean lan egitea.
Juan Antonio Pizarrok azaldu duenez, «etorkinen eta kultur aniztasunaren inguruko zurrumurru funsgabeak, estereotipo negatiboak eta aurreiritziak zabaltzeak gorrotoaren eta intolerantziaren diskurtsoa elikatzen du». Era berean, luzera begira, «desberdintasunerako, zatiketa sozialerako eta diskriminaziorako haztegi ezin hobea da».
