Idoia Mendia lehendakariorde eta Lan eta Enpleguko sailburuak harremanetan jarraitu du, asteazken honetan, eragile sozial eta ekonomikoekin, ekonomia sozialeko ordezkariekin eta sektore ekintzaileko ordezkariekin, eta horien balioa egungo krisitik ateratzeko «funtsezkotzat» jo du.
Bilera horietan mugimendu kooperatiboko ordezkariak izan dira, Konfekoop ordezkatuta, ASLEren barruan dauden Euskadiko lan-sozietateekin eta Euskal Autonomoen Elkartearekin (Ava). Sailaren aldetik, lehendakariordea buru duen ordezkaritzak Lan sailburuordea, Jon Azkue, Enpleguko sailburuordea, Elena Pérez Barredo, eta Gizarte Ekonomiako zuzendaria, Jokin Díaz, ere izan dira.
Bilera horietan, Idoia Mendiak eta bere taldeak kooperatibismoan, lan-sozietateetan edo langile autonomoetan eragina duten neurriak aztertu dituzte. Neurri horiek egungo Eusko Jaurlaritzari forma eman dion akordioan agertzen dira, eta Jaurlaritzaren programan eta Gobernu Kontseilua laster onartzeko lanean ari den legegintza-egutegian garatuko dira.
Aurreko legealdian Lan Sailak hartutako neurriak ere berrikusi dira, datozen ekitaldietan erregelamendu bidez garatuko direnak. Azpimarratzekoa da Kooperatiben Legea erregelamendu bidez abiarazi zela, arau-esparru berri bat ahalbidetuko duena, kooperatiben sektore osoaren eta Eusko Legebiltzarraren babesa izan zuena, eta enpresa-iraunkortasunerako tresna eraginkorrak dituena.
Lehendakariordeak Konfekoopeko ordezkariekin egindako bileran kooperatibismoaren balioak azpimarratu ditu, eredu sozioekonomiko arduratsua delako eta gizartearekin, enplegu duinarekin eta kalitatearekin konprometituta dagoelako, eta deslokalizazioaren aurrean lurraldean errotuta dagoelako. Eredu erabakigarria pandemiaren ondorioak gainditzeko, eta etorkizuneko eredua, Jaurlaritzak kooperatiba-mugimenduarekin eskuz esku bultzatzen jarraituko duena.
Lan-sozietateak finkatzea eta partaidetza duten enpresak arautzea ASLEren ordezkaritzarekin aztertu dira.
Lehendakariordeak solaskide guztiei adierazi die premiaz hartu behar direla enplegua berreskuratzea bultzatuko duten neurriak, bizi dugun larrialdi bereziko unea dela eta. Halaber, euskal enplegu eredua birbideratu behar dela esan du, pandemiaren ostean zain izango ditugun erronkei aurre egiteko.
Mendiak lan-arloko agenteen lankidetza eskatu du bileretan, kalitatezko enplegua sortzeko eta mantentzeko edozein aukera baliatu ahal izateko. Lehendakariordetzak eskaintzen duen zeharkakotasunak sailetako jarduerak ahalbidetuko ditu, eta horiek gobernuaren helburu erkidean txertatuko dira.
Lehendakariordeak akordiorako borondate hori zabaldu eta legegintzaldiko helburu horiek alderdi guztiei azaldu nahi dizkie, eta hala egingo du Eusko Legebiltzarrean, berak hala eskatuta, datorren astelehenean, irailaren 28an, 15: 30ean, egingo duen agerraldian.
