Barakaldok urrian berrabiarazi ditu segurtasunik gabeko puntuak hautemateko hirian barrena emakumeekin egiten diren ibilbideak. Ekimena 2017an jarri zen abian. Ekimenak emakumeei segurtasun-ezaren sentsazioa ematen dieten guneak berrikusten eta hautematen jarraitzea du helburu. Leku horietako argiztapena, irisgarritasuna eta jende gutxi ibiltzea izaten dira segurtasun-ezaren sortzaileak. Amaia del Campo alkatea eta Emakume Arloko Rakel Olalla zinegotzia hiriko elkarte feministekin eta emakume-taldeekin bildu dira gaur goizean, eta bileran, Emakume Arloak ikasturte berrirako programatutako ekimenak aurkeztu dizkiete. Udaleko alderdi politikoak eta Ertzaintza ere izan dira bileran.
Zehazki, hiriko auzoetan oinez egiteko 6 ibilbide sortu dira. «Oso positiboa izan zen lehenengo esperientzia. Herritarren eta udal-teknikarien lankidetzari esker, lurpeko lau tunel itxi eta gainazaleko eremu seguru eta agerikoak sortu genituen. Hainbat eremutan jardutea beharrezkoa zela ikusi genuen, bai argiztapen hobea jarri behar zelako, bai hiri-altzariak aldatu behar zirelako ageriko eremu bihurtzeko, edo garbitasuna hobetu eta ispiluak jarri behar zirelako «, gogorarazi du alkateak.
Orain, berriro ekingo diogu eremu berrietan zehar egiteko ibilbideei, eta arreta zenbait alderditan jarriko dugu, hala nola irisgarritasunean, garraio publikoko geltokien inguruetan, auzo bakoitzeko bide ohikoenetan ¿ «Arrontegi, Retuerto, San Bizente, Arteagabeitia, Errekatxo edo Urban bezalako eremuetako ibilbideak egitea proposatuko dugu, bai arratsaldez, bai goizez, gure hiria egunez eta gauez aztertu ahal izateko», azpimarratu du Del Campok.
Lehen ibilbidea, Auzoak lotzen izenekoa, urriaren 20an egingo da, 19:15ean. Azaroaren 3an beste ibilbide bat egingo da, Hiria eta Irisgarritasuna, eta Retuerton hasiko da, 10:00etan. Hurrengoa abenduaren 1ean izango da, Ezagutu nire auzoa, eta Lutxana auzoan barrena egingo da, 19:15ean. Laugarren ibilbidea San Bizente eta Arteagabeitia artean egingo da, otsailaren 16an, Auzo eta ibilbide seguruak izenarekin, 10:00etan. Martxoaren 23an egingo da bosgarren ibilbidea, Auzo irisgarriak, Retuerto eta Errekatxo artean, 19:15ean. Barakaldo Segurua izenekoa da orain arte programatuta dagoen azken ibilbidea, Urban auzoan egingo da, 19:15ean.
