Beatriz Artolazabal Eusko Jaurlaritzako Berdintasun sailburuaren iritziz, “gure gazteek Euskadin zer gertatu den jakin behar dute, inork ere ez dezan sekula ere ezer lehenetsi giza duintasunaren eta bizitzeko eskubidearen aurretik”. Hala esan du besteak beste Gogora – Memoriaren, Bizikidetzaren eta Eskubideen Institutuak sustatu duen ‘Gregorio Ordóñez. Bizitza posiblea’ erakusketaren inaugurazioan, Madrilen.
ETAk indarkeria behin betiko etengo duela adierazteko iragarkiaren bederatzigarren urteurrena ospatzen den egunean, Berdintasun, Justizia eta Gizarte Politiketako sailburua eta Aintzane Ezenarro Gogorako zuzendaria, Ana Iribar Gregorio Ordoñezen alargunarekin batera, erakusketa hau jendaurrean aurkezteko ekitaldian izan dira, Cibeles zentroan, Espainiako hiriburuan.
Artolazabalek nabarmendu du Alderdi Popularreko zinegotziaren heriotza Donostia-San Sebastiánen “gurea bezalako gizarte demokratikoan erailketa onartezina” izan zela, erabat. Gregorio Ordoñez tiroz hil zuten 1995eko urtarrilaren 23an, alderdiko kideekin bazkaltzen ari zela, Donostiako Alde Zaharreko taberna batean.
‘Gregorio Ordóñez. Bizitza posiblea’ erakusketa orain Madrilgo zentroan dago; Donostia-San Sebastiángo Miramar jauregian jarri zen, jatorrian, besteak beste Donostia-San Sebastiángo Udalari eta Eusko Jaurlaritzari esker, Gogoraren bidez.
Laginak euskal politikariarekin zerikusia duten 300 objektu baino gehiago ditu, besteak beste, 200 argazki, Iñaki Artetak laginerako ekoitzitako hiru ikus-entzunezko eta zenbait artelan. Horiez gainera, Antonio Muñoz Molinak eta Rafael Moneok prestatutako testuak ditu, Gregorio Ordóñezek sinatutako artikuluak, orduko neskalagunari eta etorkizuneko emazteari, Ana Iribarri, zuzendutako gutunak, bere maleta, agenda, danborra eta erailketaren egunean maletan zeraman eta Javier semeari oparitu nahi zion danborradaren inguruko komikia.
