Berdintasuna, Justizia eta Gizarte Politiketako sailburu Beatriz Artolazabal elkarrizketatu dute, gaur, Herri Irratiko «Egunon Bizkaia» saioan. Bertan, zuzentzen duen sailari dagozkion gaurkotasuneko hainbat gai jorratu ditu, besteak beste, pandemiak kolektibo ahulenetan duen eragina, genero-indarkeriaren erradikalizazioa eta berdintasuna, eta memoria historikoa.
Berdintasun, Justizia eta Gizarte Politiketako sailburuak azpimarratu du hezkuntza funtsezkoa dela berdintasunean aurrera egiteko. Hala, legegintzaldi berri honetan Hezkuntza Sailarekin lanean jarraitzeko prest agertu da, besteak beste, II. Hezkidetza Plana martxan jarriz. «Haurrek berdintasuna ikasten badute, berdinagoak izango dira», gaineratu du.
Halaber, hezkuntzak giza eskubideen, bizikidetzaren eta memoria historikoaren alorrean duen garrantzia azpimarratu du. «Gure gazteek jakin behar dute Euskadin zer gertatu zen jarduera terroristaren ondorioz, ez dugu ahaztu behar berriro gerta ez dadin», adierazi du. Sailburuak memoria, bakearen eta giza eskubideen kultura indartzeko aktibo gisa defendatu du, bizikidetza sendotuz. «Etorkizunean aurrera egin nahi badugu, iragana ezagutu behar dugu», gaineratu du.
Beatriz Artolazabalek Eusko Jaurlaritzaren barruko zeharkakotasuna nabarmendu du, eta zeharkakotasun hori, besteak beste, berdintasunaren eta giza eskubidearen arloan sailen arteko lankidetzarekin islatzen da.
Sailburuak azpimarratu du Emakunde Berdintasun, Justizia eta Gizarte politiketako Sailari atxikitzea aukera bat dela genero-indarkeriaren erradikalizazioan eta gizonen eta emakumeen arteko berdintasun erreal eta eraginkorrean aurrera egiteko, premisa hori Jaurlaritzaren lehentasuna delarik.
