Ertzaintzako bilaketa-operatiboko baliabideek Muskizen, Kobaron inguruan, itsasoan, aurkitu dute atzo desagertu zen arrantzalearen gorpua.
Aireko, itsasoko eta lurreko baliabideek gaur goizean ekin diote berriz atzo arratsaldean Muskizeko itsaslabar-inguruan desagertutzat eman zuten 72 urteko arrantzalea bilatzeko operatiboari. Ertzaintzaren Zaintza eta Erreskate Unitateko baliabide batek gaur goizeko 09:51ean aurkitu du itsasoan, bilaketa-eremuaren barruan, desagertutako gizonaren gorpua. Bilaketa-lanei atzo arratsaldeko zazpiak aldera ekin zioten, desagertutako gizonaren familiak egindako alerta-deiaren ondoren. Dirudienez, gizona goizeko lehenengo orduan irten zen arrantzara.
Gorpua aurkitu dutenean, Ertzaintzaren Begi Ikuskapeneko agenteak eta segizio judiziala bertara hurbildu dira heriotzaren inguruabarrak argitzeko dagozkion ikerketa-eginbideak hasteko. Eusko Jaurlaritzako Larrialdiei Aurre Egiteko Zuzendaritzako teknikari batek koordinatu dituen bilaketa-lanetan Ertzaintzako aireko baliabideek –helikopteroek eta droneek–, itsasokoek eta lurrekoek parte hartu dute, bai eta Osakidetzako eta Gurutze Gorriko baliabideek ere.
