Gaur bukatuko da, Errege egunez, aurtengo Bertsolataren egitaraua. Urteroko bertso jaialdi bereziarekin emango diote bukaera, arratsaldeko 18:30etan Biterin; eta puntako lau bertsolari ariko dira kantuan, taula gainean: Aitor Mendiluze, Alaia Martin, Andoni Egaña eta Onintza Enbeita. Unai Agirre hernaniarra gai-jartzaile lanetan ariko da aurtengoan.
Lau aldiz jarraian jantzi du Andoni Egañak Bertsolari Txapelketa Nagusiko txapela, eta Aitor Mendiluze buruz burukoan aritu zen 2017koan, Maialen Lujanbiorekin batera. Onintza Enbeita, berriz, Bizkaiako txapelduna da, eta Gipuzkoako Txapelketaren finalean aritu zen Alaia Martin. Maila haundiko bertsoak ziurtatuta daude.
