Astelehenean irekiko da Haur Hezkuntzako, Lehen Hezkuntzako eta Bigarren Hezkuntzako ikasleen 2021-2022 ikasturteko aurrematrikulazio-aldia. Barakaldoko Udalak bat egin du kanpaina horrekin, eta 4.000 informazio-ohar baino gehiago jarri ditu herritarren atarietan, 2 urteko haurrak dituzten familiei matrikulazio-aldiari buruzko informazioa emateko, eta hiriko zentroetako bat hautatzera bultzatzeko.
2018az geroztik, matrikulazio-datuek erakusten dute gero eta gehiago direla euskarazko ereduen aldeko apustua egiten duten Barakaldoko familiak. Izan ere, 2018an bertan, Barakaldoko 2-12 urteko adingabeen % 95,6k euskaraz egiten zituzten hizkuntza-ereduak. Apustu horrek jauzi kualitatiboa eman zuen joan den ikasturtean; izan ere, euskara hutsezko D hizkuntza-ereduan matrikulatutako ikasle gehiago erregistratu ziren, B eredu mistoan baino (euskara eta gaztelania). Hori izan zen hirian horrelako zerbait gertatzen zen lehen aldia.
Zehazki, iaz, 6.598 ikasle barakaldarrek egin zituzten ikasketak euskaraz: kopuru hori ikasketak B ereduan egin zituztenen kopuruaren (6.557) gainetik dago. Aurreko 2018-2019ko ikasturtean, ostera, D ereduaren aldean (6.448 ikasle) B eredua zen nagusi (6.531).
«Hiriko ikastetxeak aukeratzera animatzen ditugu familia barakaldarrak, haien eskaintza eta instalazioak gure auzotarrek eskatzen duten kalitatekoak baitira», adierazi du Nerea Canterok, Kultura, Hezkuntza, Euskara eta Gazteria Arloko zinegotziak. «Matrikulazio-datuek esango digute hezkuntza-ereduari buruzko ezustekoak bere horretan jarraitzen duen, baina argi geratu dena da barakaldarrek apustu argia egiten dutela beren seme-alabek euskaraz ikasteko»esanez amaitu du zinegotziak.
