Bilboko Udaleko Bidebarrieta Kulturguneak Jordi Amaten ‘El hijo del chófer’ azken liburuaren aurkezpena ospatuko du ostegunean, urtarrilak 21. Harekin batera Dani Álvarez kazetaria arituko da.
Aurkezpena Bidebarrietako liburutegiko areto nagusian izango da 19:00etan. Horretaz gozatu ahal izateko, ezinbestekoa da doako gonbidapenetako bat erreserbatzea, www.bilbaokultura.eus/bidebarrietakulturgunea webgunean. Egungo egoeraren ondoriozko segurtasun neurriak direla eta, ekitaldi-aretoko ateak 18:15ean irekiko dira, bertaratutakoak beren aulkietan egokitu ahal izateko.
Une bakoitzean indarra duten babes eta higiene neurriak zorrotz beteko dira. Era berean, ekitaldia egiten den bitartean maskara erabili beharko da.
Ezin bada parte hartu, aurkezpena streaming bidez jarraitu ahal izango da www.kulturguneatb.eus webgunean.
‘El hijo del chófer’ (Arg. Tusquets) kazetaritza-, xantaia eta ustelkeria-istorioa da, eta thriller gisa irakurtzen da. Jordi Pujolek bata bestearen atzetik hauteskundeak irabazi zituen Katalunian, eta komunikabideek ustelkeriarik gabeko oasi baten irudia eraikitzen zutenean, Alfons Quintà kazetari eta abokatuaren ibilbideak (1943-2016) —Jordi Amatek hemen berreraikitzen du, hitzez hitz— setioz eta boterez, diruz eta eraginen trafikoz betetako bidegurutze maltzurra islatzen du.
Josep Plaren itzalpean hazi zen, eta Trantsizioan ospe handia izan zuen kazetaria izan zen. Urteetan zehar, botere politiko eta finantzarioko estoldak ezagutzeari esker, Quintàk —xantaiaz, jazarpenaz eta manipulazioaz betetako artista— ibilbide mediatiko ospetsua egin zuen, argitasun kezkagarriz betea. El Pais egunkariaren Kataluniako lehen ordezkaria izan zen, eta handik atera zuen Banca Catalana auzia; Kataluniako telebista autonomikoaren lehen zuzendaria izan zen (bere aitorpenaren arabera, boterearen atzealdeaz zekielako izendatu zuten); era berean, El Observador sortu zuen, gobernu konbergentearen aldeko bitartekoa, eta haren nagusitasuna erabat mespretxatu zen; eta bere egunak ia irakurria izan gabe amaitu zituen, osasun arloko murrizketak eta Prozesuaren noraeza salatuz. Ibilbide horri amaiera tragikoa 2016ko abenduan eman zitzaion: Alfons Quintà gaixo zegoen, bikotekide ohia tiroz hil zuen eta ondoren bere buruaz beste egin zuen.
‘El hijo de chófer’ Jordi Amatek (Bartzelona, 1978) filologo eta idazleak sinatu du. 2007an Casa de América de Ensayo saria irabazi zuen ‘Las voces del diálogo. Poesía y política en el medio siglo’ obrarekin eta 2016an Comillas de Historia, Biografia y Memorias saria eskuratu zuen ‘La primavera de Múnich. Esperanza y fracaso de una transición democrática’-rekin. ‘La conjura de los irresponsables’ panfletoak gaur egungo komentarista politiko nagusietako bat bezala kokatu zuen eta ‘Largo proceso, amargo sueño’ lan polemikoa XX. mendea Katalunian ulertzeko funtsezko obra bezala kokatu da. Katalanez, besteak beste, ‘Els laberints de la llibertat. Vida de Ramon Trias Fargas’ (2009, Premi Gaziel de Biografies i Memòries) eta ‘Com una pàtria. Vida de Josep Benet’ (2017, Premi Octavi Pellissa) obren egilea da.
Datorren urtarrilaren 21ean, Dani Álvarez Bidebarrieta Kulturgunean izango da, egilearekin batera. Alvarezek, gaur egun, ‘Crónica de Euskadi’ albistegia zuzentzen eta aurkezten du Radio Euskadin, eta, aurretik, ‘Boulevard’ zuzendu eta aurkeztu zuen irrati berean. Gainera, ‘El sabor del crimen’ eta ‘El legado de los huesos’ aurkeztu ditu, ETBko bi programa hauek krimen errealak eta literarioak dituzte ardatz.
BIDEBARRIETA KULTURGUNEA kulturari eskainitako gunea da, Bidebarrietako Liburutegiaren barruan, eta kultura, literatura eta zientzia garatzea eta sustatzea du helburu.
