Aurten, osasun alarma egoera dela-eta ezingo da urteroko Zuhaitz Eguna egin. Baina udalak, berdeguneen eta ingurugiroaren zaintzaren inguruan egiten duen lanaren baitan urteroko landaketari eustea erabaki du. Hala, datozen egunotan espezie desberdinetako 50 zuhaitz landatuko dira herriko txoko desberdinetan.
Loiolarako bidean eta bidegorrian, Goenan, Antzibarrenan, Garmendin, Salben, Euskalerrian eta Izarraitzko atea parkean eta inguruan landatuko dira zehazki zuhaitzak. Zazpi tulipero, 16 likindabarra, 11 urkizuri eta urki, lau gereziondo, bi ezki, hiru pago, bi hibiscus syriacus eta artea, Astigarra, taxodium distichum eta sequoia semperviven bana landatuko dituzte.
Aitor Bereziartua Ingurumen Batzordeburuaren hitzetan, zuhaitzek duten garrantzia aintzat hartuta erabaki dute aurten ere zuhaitzak landatzea: “Askotan, ahaztu egiten zaigu zuhaitzek gure ingurumenean duten garrantzia. Baina, Azpeitiko Udalak ingurumenaren zaintza eta berreskuratzean eta kutsadura gutxitzearen baitan duen konpromisoaren aintzat hartuta erabaki du urteroko landaketari eustea”. Azken urteotan goiz “polita” izan ohi da Zuhaitz Eguna, herritar ugari animatu izan ohi direlako; horretarako baldintzarik ezean, Kimu bat enpresak landatuko ditu zuhaitzak: “Ohitura polita da zuhaitzak haurrekin landatzekoa, eta datorren urtean osasun baldintzak laguntzen badute ebgingo dugu berriro herritarrekin batera”, gaineratu du.
