Euskal Herriko Agintaritzaren Aldizkarian argitaratu da Euskadiko merkataritza-ekipamenduaren sektoreari zuzeneko laguntzak emateko agindua. Diru-laguntzak martxoaren 9ko bederatzietatik hil honen 30era arte eskatu ahal izango dira. Laguntza-programa berezi honek 15.800.000 euroko aurrekontu-zuzkidura du esleituta.
Programa honen helburua da euskal txikizkako merkataritzaren ekipamendu pertsonalaren azpisektorea babestea eta hari laguntza ekonomikoa zuzenean ematea. Sektore hori izan da COVID-19ren hedapena geldiarazteko hartutako neurriak gehiago kaltetu duenetako bat.
Laguntzak eskuratu ahal izango dituzte beren konturako langileek edo langile autonomoek, ondasun-erkidegoek, sozietate zibilek eta euskal txikizkako merkataritzako mikro-enpresek eta enpresa txikiek, baldin eta establezimendu espezializatuetan jantzien txikizkako merkataritza edo oinetakoen eta larruzko artikuluen txikizkako merkataritza egiten badute. Merkataritza-establezimenduak Euskal Autonomia Erkidegoan egon behar du. Pertsona edo erakunde onuradunari eman beharreko laguntzaren zenbatekoa saltokian alta emandako langile kopuruaren arabera ezartzen da. Bederatzi langile arteko establezimenduek 4.000 euro jasoko dituzte, eta 10 langile edo gehiago dituzten establezimenduek 4.500 euro.
Ezohiko programa honetako laguntzak bateragarriak dira beste administrazio publiko edo erakunde pribatu batzuetatik jasotako beste edozein diru-laguntza, laguntza, diru-sarrera edo baliabiderekin.
Programa hau premiazkoa denez ahalik eta azkarren egin ahal izango dira eskaerak. Administrazio-izapideak errazteko, espedienteen izapidetze elektronikoa egitea erabaki da. Izapide horiek bitarteko elektronikoen bidez baino ez dira egingo, helbide honen bidez:
https://www.euskadi.eus/servicios/1112901
Turismo, Merkataritza eta Kontsumo Sailak telefono bat jarri du interesdunen eskura, prozeduraren inguruko zalantzak argitzeko:
945 01 77 50
