Egia, justizia eta erreparazioa aldarrikatu zuen udalak beste behin. Tortura kasu horien atzean dauden gizon emakumeek jasan zutenaren inguruko «egia ezagutu, plazaratu, argitu, justizia egin eta erreparazioa jasotzeko duzuen eskubidea aldarrikatu nahi dugu». horretarako ezinbestekotzat jo zuen iraganeko giza eskubide urraketa guztien ikerketa. Udala Aranzadi Zientzia Elkartearekin elkarlanean 2014an memoria ikertzeko abiatutako bideanari da horretan, eta 1936tik gaur artean Azpeitian gertaturiko giza eskubide urraketa guztiak ikertzen jarraitzeko konpromisoa agertu zuen: «Memoria bizia baita, eta testigantza eta datu berriak azaltzen diren bakoitzean goaz memoria eta historia osatzen, eta gertatutakoa ezagutzen. Beraz, oraindik inork bere kasua azaldu, ikertu eta jaso nahiko balu, udalaren eta Aranzadiren ateak irekita ditu», zehaztu zuen.
Memoria gerra garaiko eta frankismokoaz gain, gertuko memoriaz ere badela nabarmendu zuen: «Gaur egun oraindik ere motibazio politikoz urratuta jarraitzen duten giza urraketez eta sufrimenduez ere ari gara memoriaz hitz egitean. Eta, giza eskubide urraketez hitz egitean minaz hitz egiten dugu. Min fisikoaz eta psikologikoaz, barneko zauriez eta itxi gabekoez. Eta inork inoiz errekonozitu gabekoez».
Begirada kritikoa aldarrikatu zuen etorkizuna eraikitzeko, «ezin dugu onartu iraganaren parte bat ezkutuan geratzea edo behar beste ez ikertzea. Demokraziarekin eta giza eskubideekin konpromisoa duen erakunde orok du tortura testigantza edo salaketak ikertzeko betebeharra. Inpunitatearekin amaitzea ezinbestekoa da tortura kasurik berriro gerta ez dadin», amaitu zuen.
Oihana Zabalzak «familia osoaren izenean eskerrak» eman zizkien Soreasun babesa adierazi zieten guztiei.
