AZTIk FoodTure txostena aurkeztu du, elikaduraren arloan berrikuntza aktibatzeko eta zientziaren bidez gizartearen eraldaketa jasangarri eta osasungarriari laguntzeko kontuan hartu beharreko alderdi garrantzitsuenak jasotzen dituen gida.
Nekazaritza elikagaien sektoreko 400 ordezkari baino gehiagok parte hartu dute online egin den aurkezpen ekitaldi batean. Bertan, Javier Plasencia, Eusko Jaurlaritzako Elikagaien Kalitate eta Industriako zuzendaria izan da.
FoodTure txostenak ondorioztatu duenez, osasun-krisiak are gehiago utzi du agerian nekazaritzako elikagaien ehun sendoa, fidagarria, berritzailea eta jasangarria izatearen garrantzia.
Egoera berri horrek digitalizazioaren aldeko apustu argia eskatzen dio elikagai-industriari, hornidura-katetik hasi eta kontsumitzailearenganainoko efizientzia handiagoa garatu ahal izateko eta, horrela, kontsumo-eremuetako eskaera berriei aurre egin ahal izateko. Prozesu horretan, elikagaien arloko berrikuntzak eta ikerketak zeregin garrantzitsua izango dute sektorearen bideragarritasuna bermatzeko.
Ildo horretan, Javier Plasenciak azpimarratu nahi izan du Eusko Jaurlaritzak Euskadiko nekazaritza elikagaien sektorea berritzaile eta lehiakorra izateko egiten duen apostu finkoa, zuzeneko laguntza ekonomikoen eta Gastronomia eta Elikaduraren Plan Estrategikoak jasotzen dituen ekintzen bidez. Helburu hori bi norabidetan bideratzen da: batetik, landa-ingurunearen balorizazioa, modernizazioa eta lehiakortasuna areagotzea, zerbitzuak digitalizatzen lagunduz, haren mamia galdu gabe, eta, bestetik, kontsumitzaile mota berri batentzako elikagai berrietan aurrera egitea, bertako produktu osasungarriak, seguruak eta jasangarriak bilatuz.
FoodTure txostenari buruzko datuak
Gidak azaltzen duen moduan, pandemiak aldaketa handia eragin du familien elikadura-kontsumoaren patroietan. Konfinamenduan, azalera handietako gastuaren igoera% 50 handitu zen konfinamenduaren aurreko mailekin alderatuta. Era berean, onlineko elikagaien erosketa% 60tik gora igo zen, eta jatetxe-arloko gastua minimora jaitsi zen (% 90 jaitsi zen).
Gida honek orainaren ikuspegi holistikoa eskaintzen du, bai eta elikagaien industriaren etorkizunerako proiekzioa ere; izan ere, etorkizuneko sektore estrategikoa da mundu mailan, garapen jasangarria lortzeko, Nazio Batuen Erakundeak 2030erako proposatutako Garapen Iraunkorreko Helburuen ildotik. Funtsezko sektorea da Euskadin eta Estatuan, bai ekonomiari egiten dion ekarpenagatik – 2020ko bigarren hiruhilekoan, lehen sektoreak% 3,8 baino gehiago eman zion estatuko BPGd-ari (2019arekin alderatuta,% 1,1 gehiago) –, bai gizarte osorako oinarrizko premia bat betetzeagatik.
Gidak, gainera, ekimen aitzindariak biltzen ditu, sektoreko hainbat enpresak abian jarri dituztenak, aldaketa-testuinguru horri aurrea hartuz eta merkatuaren behar berriei erantzunez. Eremu horretako enpresei aukerak estrategia eta ekintza zehatz bihurtzeko arrastoak ere ematen dizkie.
FoodTure gida gaurtik dago eskuragarri AZTInnova plataforman. Elikaduraren balio-kateko berrikuntzarako eta networking-erako komunitate birtual esklusiboa da, eta berrikuntza-proiektuak elkarlanean diseinatu, planifikatu eta garatzea du helburu, sektoreak dituen erronkei irtenbideak aurkitzeko.
