Asier Villalibrek telematikoki erantzun ditu hedabideen galderak Lezamako prentsa aretotik, 19-20 Kopako finala jokatzeko bost egun falta direnean.
Athleticeko aurrelariak adierazi duenez, taldeak “normaltasunez” bizi du larunbateko hitzordu nagusiaren aurreko astea: “Orain, ez zara etxetik hainbeste irteten eta ez duzu finalean hainbeste pentsatzen, babesten zaitu. Badakigu ez dugula presiorik sartu behar eta lasai gaude. Giro ona dago eta oso pozik gaude. Final bat jokatzea gutxitan gertatzen da. Zorte handia dugu eta aprobetxatu eta gozatu egin behar dugu”.
Taldearen egoerari dagokionez, atzo itzuli zen entrenamenduetara, bi eguneko atsedenaldiaren ostean, eta Gernikakoak egoera ezin hobean ikusten du: “Taldea ondo dago fisikoki. Egun libre pare baten ondoren, burua garbi daukagu eta taldea oso ondo ikusten dut”.
Villalibrek onartu du itxaronaldia, iaztik, luzea egiten ari dela, eta kapitainak horri aurre egiten laguntzen ari direla: “Beteranoenek normaltasunez eramaten dute guk gauza bera egin dezagun. Nolabait, irabazi beharreko beste partida bat da eta ez dugu horretaz hitz egiten, egunez egun goaz. Haien esperientziak gu nola senti gaitezkeen ulertzen laguntzen die”.
Sevillako lehen finalaren gakoaz galdetuta, taldeak “gure jokoa egin ahal izatea” dela esan du. “Bi taldeak leialak izango gara haien estiloarekin. Oso talde indartsua ikusten dut Reala, aurrealdean asko sortzen duena eta oso ondo jokatzen duena. Aurkaria errespetatuz gero, partidaren bila aterako gara. Gakoa gu gara talde gisa. Intentsitatearekin jokatu behar dugu eta partidaren bila joan”.
