Eusko Jaurlaritza sostengatzen duten bi alderdi politikoen, EAJ-PNV eta PSOE, aldeko botoekin, Diputatuen Kongresuko Batzordean Klima Aldaketaren aurkako Legearen zirriborroa onartzeak Euskadiko gasaren esplorazioaren eta ustiapenaren etorkizuneko kudeaketari buruzko interpretazioak eragin ditu.
Eusko Jaurlaritzak dagoeneko bere egin ditu COP-21en hartutako konpromiso guztiak, Parisen egin zen eta 2019ko uztailean Larrialdi Klimatikoa deklaratu zen, eta Gobernu Programan aurkeztu zituen bere konpromisoak. Hori dela eta, ezagutzen ditu eta partaide da Klima Aldaketaren aurkako etorkizuneko legeriaren inguruan egiten ari diren hausnarketa eta planteamendu instituzionaletan.
Horregatik, Eusko Jaurlaritzako Ekonomiaren Garapen, Jasangarritasun eta Ingurumen Sailak honako hau argitu nahi du:
- Gorte Nagusietan izapidetzen ari den testuaren argitan, Subijanako Armentia 2ko putzuan gasa ustiatzea erabat baztertuta geratzen da.
- Izapidetzen ari den testuak eta indarrean dagoen legeak aukera ematen dute esplorazioa egiteko, eta aukera hori bertan behera geratuko litzteke, hori adierazten duen arau edo epai bat aldarrikatzen denean. Hala ere, Ekonomiaren Garapen, Jasangarritasun eta Ingurumen Sailak uste du ez duela zentzurik ustiatzeko aukerarik gabe Eusko Jaurlaritzak trantsiziokotzat jotzen duen energia-iturri bat esploratzeak.
- Energiaren Euskal Erakundeak izapide hori geldiarazteko modua aztertuko du, erabaki horrek EEEren mendeko Shesa sozietate publikoari dagozkion ondare-eskubideak galtzea ekarri gabe.
Gune honetan gasa ikertzen jarraitzeko administrazio-izapideak 2011. urtean hartutako erabakiaren barruan kokatu behar dira, Shesa izan zedin baimen horiek izapidetzeko operadorea eta subjektua.
Hori dela eta, Shesak ezin ditu bere betebeharrak alde batera utzi, ezta ondare- eta kudeaketa-eskubideei uko egin ere. Proiektu horretarako, bazkide batzuez gain, aldeko ingurumen-baimena ere badu, 2019an Trantsizio Ekologikoko Ministerioak berak egindako esplorazioaren izapidetzean aurrera egiteko.
- Ekonomiaren Garapen, Jasangarritasun eta Ingurumen Sailak ondorioztatzen du lege-testu berria onartuta, ez dagoela Euskadiko gas-ustiapenari buruzko eztabaidarik, eta gogorarazten du energia berriztagarriko instalazioen exekuzioa premiaz bizkortu behar dela, Euskadiko trantsizio energetikoaren konpromisoei eta helburuei erantzuteko, alde anitzeko nazioarteko erakundeen helburuekin bat etorriz.Ildo horretan, gogorarazi du Euskadin badagoela parke eoliko berriak instalatzeko aurreikuspena, eta baita, hiru lurraldeetan energia berriztagarria sortzeko jarduerak eta formulak hedatzen jarraitzeko asmoa ere.
