Idoia Mendia lehendakariorde eta Lan eta Enplegu sailburuak berretsi egin du eragile sozial eta politiko guztiekin enplegu arloko adostasunak zabaltzeko borondatea, baina ohartarazi du ez diela betorik jartzen gobernu programaren ardatzei.
SER Euskadi ‘Enpleguaren etorkizuna Euskadin’ topaketetan parte hartu duen bitartean, Mendiak Enpleguaren Euskal Estrategian proposatzen den enplegu inklusibo eta parekiderako herri ituna azaldu du. Estrategia hori Gobernu Kontseiluak onartu zuen atzo, Elkarrizketa Sozialerako Mahaian esertzen diren eragileen artean bi hilabetez akordioa bilatzen aritu ostean. Lan horiei esker, guztien ekarpenak sartu dira, kalitatearen eta berdintasunaren ardatzak eta enplegu-politika aktiboetarako eskubide subjektiboa indargabetu nahi zituztenak izan ezik.
Estrategia Legebiltzarrera bidali da dagoeneko, lehendakariordearen erabakiz eztabaida monografiko bat egin dadin eta dokumentuan sartzen diren taldeen ebazpen-proposamenei hasiera eman dakien. Hamarkada batez enplegu-politikak markatuko dituzten oinarri horien gainean, legegintzaldi honetarako plan estrategiko bat onartuko da, Gizarte Elkarrizketaren Mahaiaren bidez garatzen jarraituko dena.
