Arantxa Tapia Ekonomiaren Garapeneko, Jasangarritasuneko eta Ingurumeneko sailburuak gaur goizean Radio Vitorian egindako elkarrizketan azpimarratu duenez, trantsizio energetikoa adostasunez egitea oso garrantzitsua da, «ez baititugu ingurumenaren bermeak urratuko, inola ere ez».
Tapiak azaldu duenez:
«Parke eolikoetarako kokalekuak aztertzen ari dira Euskadi osoan, nahiz eta Araban aurreratuxeagoak egon; horregatik hasi da hemendik. Garrantzitsua da lurraldearentzat, Euskadiko mix energetikoan eta Arabako udalerrietan eragiten duelako. Baina zalantzak badaude edo egoki ikusten ez bada, ez dira jarriko; bakoitzak bere ezaugarriak ditu, eta parke bakoitzaren ingurumen-inpaktuaren adierazpenaren mekanismoak bermatuko digu proiektuak aurrera ateratzea”.
“Espero dut ahalik eta adostasun handiena lortzea; izan ere, Trantsizio Energetikoaren eta Klima Aldaketaren Legea babestu dugu, eta horrek esaten digu ezin dugula hidrokarburorik atera, eta energia berriztagarriek % 70era iritsi behar dutela, baina Euskadin% 15ean gaude. Egin beharreko bidea garrantzitsua da, proiektu mota guztiekin, txikiak eta handiak, edo ez gara ekoizpen-maila horietara iritsiko”.
“Energia garbia nahi badugu, sortu egin behar da. Jakin behar dugu era guztietako proiektuak behar ditugula, txikiak eta handiak: eguzki-plakak teilatuetan, autokontsumoa bai, baina ez da nahikoa. Ingurumen-berme guztiekin, proiektu handiagoak, eraginkorrak eta ingurumen-berme handienekoak abian jartzeko gai izan behar dugu «.
Sailburuak azpimarratu du, halaber, Eusko Jaurlaritza Energia Berriztagarrien Plan Orokorra lantzen ari dela une honetan, ezinbestekoa baita energia eolikoa sor daitekeen lekuak ezartzea. Berdin fotovoltaikoari dagokionez, edo beste mota batzuei dagokienez ere.
Subillan gasa ustiatzea bertan behera uzteaz, gogorazi du Shesak oraindik ere baimen batzuk dituela, eta modu egokian kudeatu beharko dituela. Horretarako, bazkideekin aztertu beharko ditu. «Bide hori itxi dugu, eta berriztagarriak indartuko ditugu, nahiz eta jakin gasa trantsizioko energia izango dela urte askotan, eta guk zero kilometroko gasaren aldeko apustua egiten genuen. Orain beste leku batzuetatik ekartzen jarraitu beharko dugu «.
Pandemia eta krisi ekonomikoa
Tapiak Maritxu Diezen galderei erantzun die: «Pandemiatik irtetea atzeratzeak krisi ekonomikotik irtetea ere atzeratuko du. Txertaketa-erritmoa hazten ez den bitartean, irteera-erritmoa espero genuena baino txikiagoa izango da, baina txertaketa-erritmoa igotzea lortzen badugu, eta europarrak garen heinean, txertaketari modu sendoagoan eta azkarragoan aurre egiteko gai bagara, Estatu Batuak edo Txina bezala, ekonomikoki ere hobetzen hasiko gara”.
“Euskadin, Europa osoan bezala, hobekuntza ekonomikoa txertaketa-erritmoari lotuta egongo da. Osasun krisia beti egon da lotuta krisi ekonomikoarekin, baina tunelaren amaierako argi txiki hori hor dago”.
“Ekonomikoki hazteko gai izan ez bagara, ERTEak ERE bihurtuko dira. Arrisku hori badago, baina pandemiaren aurreko egoerara itzultzetik harago, hazten eta hobetzen ere saiatuko gara”.
