Ertzaintza eta udaltzaingoak indarrean dagoen osasun-araudia betearazteko kontrol eta zaintza lanetan aritu dira asteburuan. Poliziak prebentzio eta disuasio lanetan aritu dira, besteak beste, Bilbon, Getxon, Leioan, Berrizen, Lemoan eta Ordizian gauerdia egin diren elkarretaratzeak edo botiloiak sakabanatzeko.
Leioan, Artazako parkean, istiluak izan dira, hainbat pertsona baitzeuden elkartuta. Gazte talde batek objektuak bota dizkie herritarren babeserako bi patruilari, eta laguntza emateko agenteak eta Brigada Mugikorra mobilizatu dituzte, beraz. Agenteak onik atera dira, eta, azkenean, hiru pertsona identifikatu dituzte eta isuna jartzeko proposatu dituzte osasun-araudia urratzeagatik (kalean edateagatik) eta errespetua galtzeagatik.
Beste herri batzuetan Ertzaintza eta udaltzaingoak prebentzio eta disuasio lanetan aritu dira, kalean alkohola edatea debekatuta dagoela behin eta berriz gogoratuz. Jende gehiena sakabanatu egin da patruilak iritsi direnean, esate baterako, Getxon, Berrizen, Bilbon (Artxandako merenderoan), Arrigorriagan, Santurtzin, Ordizian eta Lezon.
Pertsona batzuk identifikatu dituzte eta isunak jartzeko proposatu dituzte, eta, horrela, 55 akta bete dituzte gauerditik osasun-araudia urratzeagatik, hau da, maskara ez janzteagatik edo kalean edateagatik.
