Azpeitiko Udalak jarri du abian epe laburrean herrian etxe tutelatuak izatea ahalbideratuko duen lehiaketa publikoa. Martxoan eman zuen jakitera herrian adinekoei eskaintzen zaizkien zerbitzuen baitan etxe tutelatuen zerbitzua jartzeko proiektua zuela. Hala, dagoeneko etxeen exekuzioa abian da. Obrek 1.341.936,55€ ko gehienezko aurrekontua izango dute eta eslaipendunak 18 hilabeteko epean bukatu beharko du azpiegitura. Obrak gauzatzeko eskaintzak egiteko epea maiatzaren 20an bukatuko da.
Beharrei erantzuteko, zerbitzu berria
Datozen hamarkadan emango den gizartearen zahartze nabarmena aintzat hartuta Azpeitiko Udalak hainbat ikerketa eta azterketa egin ditu. Urtez urte 65 urtetik gorako herritarren egoera aztertzeko, adin tartetako azterketak ere egin dira. Eta iaz, azterketa prospektibo bat eta zerbitzuen eta beharren analisia ere egin zuen.
“Azterketek diote, gizartea zahartzen ari den bezala, behar eta zerbitzu berrien falta izango dela. Gaur egun, Azpeitian zerbitzu aurrerakoiak ditugu menpekotasuna prebenitzeko. Eta bide horretan sakontzen jarraituko dugu”, adierazi du Leire Goenaga Gizarte Zerbitzuetako batzordeburuak. Etxe tutelatuak ere, bide horretan garatuko dira: “Etxe tutelatuak, laguntza behar duten, baina menpekotasunik edo menpekotasun gutxiko herritarrei zuzendutakoak izango dira. Zerbitzu horren bidez, erabiltzaileen bizi kalitatea hobetuko da”, zehaztu du.
