Eusko Jaurlaritzak, Ekonomia eta Ogasun Sailaren bitartez, baliabide materialekin eta giza baliabideekin indartuko du Finkatuz Funtsaren (FEI) egitura. Funts horren helburu soziala da Euskadiko enpresa handietan epe luzeko finantza-partaidetzak eskuratzea, besterentzea eta kudeatzea, hemen sustraituko direla eta euskal produkzio-sare osoan trakzio-izaera izango dutela bermatzeko.
Horretarako, eta lehen urrats gisa, Eusko Jaurlaritzak apirilean «FINKATZE KAPITALA FINKATUZ, S.A.» sozietate publikoa sortzea onartu zuen. Sozietate horren sorrerako kapital soziala 160M/€-koa da, eta aurreikusten da legegintzaldian zehar kapital soziala handitzea, 300 m/€-ra iritsi arte.
Aurreikuspen horien berri eman du Hernando Lacalle Eusko Jaurlaritzako Finantza eta Aurrekontu Sailburuordeak, gaur, Iruñean Nafarroako Enpresa Korporazio Publikoak antolatuta egin den Enpresa Korporazio Publikoen Estatuko I. topaketan.
Foro horretan, Lacallek Eusko Jaurlaritzari lotutako finantza-tresnen errepasoa egin du, eta nabarmendu du «funts publikoen hornidura handia» dagoela, «Jarduketa-ildo itzulgarrien bidez kudeatuta, eta esperientzia handia metatu dela enpresa-laguntzako politikak ezartzeko funts itzulgarrien abantailei buruz».
Ekonomia eta Ogasun Saila eta Ekonomiaren Garapen eta Azpiegitura Saila dira horren bultzatzaile nagusiak. «Bien arteko koordinazioa gero eta emankorragoa da arlo honetan, baina ez dago formalki osatuta talde teknikoen artean», zehaztu du sailburuorde honek.
Haren ustez, kreditu-finantzaketa esanguratsua da partaidetza publikoak merkatu-akats bati hel diezaiokeela uste den eremu espezifikoetan; alegia, modu orokorrean ez, baizik eta tamaina handikoak direnean (FEI maileguak) edo politika publiko zehatz batzuekin lotura dutenean (aurrerakin itzulgarriak).
Bermeak emateari dagokionez, Eusko Jaurlaritzaren laguntza duten finantza-tresnen loturen mapan nabarmena da Elkargiren (Elkarrekiko Garantia Elkartea) ekintza-gaitasun handiaren protagonismoa.
Kapital-inbertsioen eremuan jarduteko dagoen logika da, enpresen lehen bizitza-faseetako eragiketetan inbertsio zuzenen bidez eragitekoa. Baina, inbertsio berriak egitea eragile pribatuen sarreraren araberakoa izango da, hau da, elkarlan publiko-pribatua jomuga.
Horri gehitu behar zaio foru-aldundiek haien kontura garatutako ildo espezifikoak daudela, bai eta Estatuko Administrazio Orokorrak foru- eta estatu-sistemako agenteen bidez bideratzen dituen jarduerak ere.
Finantza-tresna berrienari erreparatuz, Lacallek Eusko Jaurlaritzak bultzatutako sozietate berriari erreparatu dio («FINKATZE KAPITALA FINKATUZ, S.A.»). FEIk sozietate publiko berriaren esku jarri ahal izango ditu merkataritza-sozietateen kapitaleko akzioak eta partaidetzak, lehentasunezko harpidetza-eskubideak, obligazioak, kredituak eta bere titulartasuneko beste edozein antzeko eskubide. Horretarako, betiere estatutuetan aurreikusitako inbertsio-irizpideei eta jarduketa-printzipioei erantzun beharko diote. FEIri dagozkion bazkide-eskubideak Administrazio Kontseiluak baliatuko ditu, eta akziodunen batzar orokorra eratuko du.
Nafarroako Biltzar Jauregian eta Auditorioan egindako topaketa honek politika-, kudeaketa- eta enpresa-arloko hitzaldiak eta eztabaida-mahaiak uztartu ditu, eta, amaitzeko, izaera publikoko enpresa-jardunbide egokien adibide batzuk eman ditu.
