Ertzainek 32 urteko gizonezko bat atxilotu zuten atzo goizaldean, Donostian, indarkeria-zantzu argiekin hilda aurkitu zuten beste gizonezko baten bortxazko heriotzan ustez inplikatuta egoteagatik.
Goizaldeko ordu bat eta erdiak aldera, Ertzaintzari jakitera eman zioten gizonezko bat lurrean etzanda eta konorterik gabe zegoela Donostiako Lauaizeta kalean. Herritarren segurtasunerako patruila bat berehala agertu zen adierazitako lekura, eta egiaztatu zuen gizonak ez zuela bizi-konstanterik eta gorpuak kriminalitate-zantzu argiak zituela.
Inguruan odol-arrasto handia zegoen, eta bertan aparkatuta zegoen autokarabana baten barruan aurkitu zuten pertsona batek ere odol-arrastoak zituen jantzietan. Susmagarria identifikatu egin zuten, eta beharrezko frogaketak egin ondoren, atxilotu egin zuten gertakarietan inplikatuta egon zitekeelakoan.
Ertzaintzak egindako lehenengo ikerketen arabera, biktimak eta arrastatu duten gizonak elkar ezagutzen zuten, eta dagokion ikerketa jarri du abian zoritxarreko gertaeraren inguruabarrak argitzeko.
