Ekonomia Bultzatzeko zinegotzi Marisol Garmendiak adierazi zuenez, «hitzarmen honekin, CEIT bezalako hiriko erreferentziazko teknologia-zentroekin batera egiten ari garen lanari jarraipena ematen diogu, Donostiaren ezaugarri bihurtzen ari den zientzia eta berrikuntzako ekosistema bat sendotzeko. Horretarako, talentua lokalizatu, erakarri eta atxikitzen dugu, eta zentroetatik tokiko enpresa-sarera eramaten dugu ezagutza «.
Donostiako Sustapenak eta CEITek talentua erakartzeko eta garatzeko elkarrekin lan egiteko konpromisoa hartu dute, langileak zentro teknologikoan sartzeko aukerak identifikatuz. Plaza profesional horiek Donostiako Sustapenak antolatuko duen Gazte Talentuaren Azokaren eskaintzaren parte izango dira. Halaber, Bono Teknologikoa aktibatuko dute berriro, CEITek Donostiako ETEei eskain diezaiekeen ikerketa teknologikoko zerbitzuen katalogo bat garatuta.
Hezkuntzaren arloan, bi erakundeek bokazioak sustatzen lagunduko dute, fabrikazio aurreratuan, mugikortasunean, jasangarritasunean eta digitalizazioan, CEIT erreferente den aldetik.
Ekintzailetzari dagokionez, CEITek Donostia Sustapenaren start up-etarako Ekin+ azelerazio-programara bideratzeko proiektuak identifikatuko ditu. Udal-sozietate horrek, bestalde, ekintzailetza-gaitasunak garatzen lagunduko die CEITeko ikertzaileei, prestakuntza-jardueren bidez.
Hitzarmen horrekin, CEITek Donostia Weekinnen parte hartuko du berriro, zientziaren dibulgazioari eta bokazio zientifikoen sustapenari buruzko edukiekin. Hitzarmenak jasotzen duen beste lan-ildo bat Next Generation eta Horizon Europe funts berrien esparruan ikerketa-proiektuen aurkezpenarekin lankidetzan aritzeko aukerak batera aztertzea da.
Donostiako Sustapenak eta CEITek lankidetza estua dute duela urte batzuetatik, hainbat hitzarmen eta programaren bidez.
