Barakaldok berriro irekiko ditu Munoa Jauregiko ateak, hiriko harribitxi monumentalaren barrualdeaz gozatu ahal izateko. Horrela jakinarazi du Kulturako Nerea Cantero zinegotziak irailean, urrian eta azaroan abian izango den Munoa Barrutik programa aurkeztu duenean.
2019an iritsi zen Munoa Barrutik ekimena hirira, 374.307,28 euroko inbertsioarekin jauregiko estalkia berreskuratu eta birgaitu ondoren. Ekimena joan den urtearen hasieran itzuli zen, baina koronabirusaren pandemiaren ondorioz, bisitak atzeratu behar izan zituzten. Orain, udari begira, proiektua berreskuratuko da, barakaldarrek Munoa Jauregiaren barrualdea ezagutzen jarrai dezaten, aurreko mendeko burgesiaren bizimodua ezagutzen laguntzeko izango dituzten audio-giden azalpenekin (gaztelaniaz eta euskaraz).
Zehazki, bisitak larunbatetan (17:00etatik 18:00etara) eta igandeetan (11:30etik 12:30era eta 13:00etatik 14:00etara) egingo dira. Bisitaldiak jauregiko solairu noblean egingo dira, eta honako ibilbide hauek egingo dira: atondoa, korridorea, egongela handia, jangela, office-a, kapera, Horacio Echevarrietaren bulegoa, beste bi areto, eskailera eta beiratea. Taldeak gehienez 20 lagunekoak izango dira.
EKIMENEAN IZENA EMAN
www.barakaldo.eus, Barakaldo APP-a, 010 edo, Barakaldotik kanpo deitzen bada, 944789200 telefonoaren bidez, aurrez aurre Herritarrentzako Arreta Zerbitzuan (HAZ): Herriko Plazan, Gurutzetako zentro zibikoan eta Clara Campoamor zentroaren bulegoan.
Izen-emate epea bihar, uztailak 15, irekiko da. Ekimenak 2 euroko kostua du; euro 1 du jubilatu, pentsiodun, langabe eta 7 eta 12 urte bitarteko adingabeentzat. Doan izango da 0 eta 6 urte bitarteko adingabeentzat.
«Pandemiak ez zuen eragotzi bisita horiekin aurrera jarraitzea, baina iritsi da Munoa jauregiko ateak berriz irekitzeko ordua, bere sekretuetan murgiltzeko, bere altxorrak ezagutzeko eta burgesiak bere garai gorenean izan zuen bizimodua irudikatzeko», adierazi du Canterok, eta herritarrak animatu ditu monumentu-multzo hau ezagutzera, horrela izendatu baitzen 2017an, finkako lorategi, kotxe-toki eta eskultura apaingarriekin batera.
