Bihartik aurrera, Euskadiko 12 urtetik gorako biztanleek Osakidetzaren webgunearen bidez lortu ahal izango dute txertaketa-hitzordua
Gotzone Sagardui Osasun sailburuak iragarri duenez, bihartik aurrera 12 urtetik gorako Euskadiko biztanleek Osakidetzaren webgunearen bidez lortu ahal izango dute txertaketa-hitzordua. Euskadin 12 eta 15 urte bitarteko 87.000 gaztek baino gehiagok izango dute hitzordua hartzeko aukera bihar goizetik aurrera. Gobernu Kontseiluaren osteko prentsaurrekoan azaldu duenez, txertaketaz gain, Euskadiko egoera epidemiologikoaren eta asistentzialaren balantzea ere egin du.
TXERTAKETA
Txertaketari dagokionez, sailburuak hainbat ohar egin ditu:
- Joan den astean, Euskadik milioi bat pertsona baino gehiago zituen bigarren dosiarekin. Gaur egun, 16 urtetik gorako Euskadiko biztanleen % 62k baino gehiagok amaitu dute txertaketa-prozesua.
- Datorren astean amaituko da AstraZenecaren administrazioa 60 urtetik gorakoentzat.
- 29 urtetik beherakoei dagokienez, orain arte 146.094 hitzordu eman dira.
Hala ere, uztaileko eta abuztuko agendetan tarteak daude oraindik. Hori dela eta, sailburuak iragarri du bihar Osakidetzak bere webgunean 12 eta 15 urte bitarteko pertsonei txertoa jartzeko hitzordua eskaintzeko aukera jarriko du martxan. “Horrela, talde horren txertaketa prozesua ikasturtea hasi baino lehen hasiko da», adierazi du Gotzone Sagarduik.
Bestalde, txertaketetan egunero soberakinen bat izaten denez, kanal bat jarriko da martxan behar bezala egiaztatutako lan- edo ikasketa-arrazoiengatik beste herrialde batzuetara joateko txertoa hartu behar duten pertsonentzat. Informazioa Osasun Sailaren webgunean egongo da eskuragarri bihartik aurrera.
Azkenik, 12 urtetik gorakoen txertaketa-prozesua hasi ondoren, sailburuak adierazi du Euskadiko txertaketa-prozesuari buruzko informazio-buletina aldatu egingo dela. «Horrek lehen dosian eta jarraibide osoarekin txertatutako pertsonen ehunekoak pixka bat murriztea ekarriko du», azaldu du.
EGOERA EPIDEMIOLOGIKOA
Osasuneko sailburuak adierazi duenez, 100.000 biztanleko 14 egunetan metatutako intzidentzia-tasa 6 aldiz biderkatu da azken asteotan, eta ospitaleetan sartzen den pertsona kopurua hazten ari da, nahiz eta «ez duen aurreko olatuen korrelazio bera».
«Agertoki guztiz berria da. Herritarrak jakitun dira. Maskaren erabilera murriztu egin da. Badirudi beldur sentsazioa galdu dela. Udak, oporrek, atseden hartzeko eta erlaxatzeko beharrak birusa hedatzen lagundu dute. Ezin dugu dena txertaketaren esku utzi. «
