Idoia Mendia lehendakariorde eta Lan eta Enpleguko sailburuak Koopera kooperatiba-enpresak garatzen duen ekonomia zirkularraren proiektua babestu du gaur, eta, ziurtatu duenez, Eusko Jaurlaritzak onartu berri duen 2030erako Enpleguaren Euskal Estrategiak jasotzen dituen lan-ildoen barruan kokatzen da.
Koopera enpresa kooperatiboak Mungian duen ehungintza tratatzeko planta bisitatu du gaur Mendiak, Elena Perez Barredo Lan eta Gizarte Segurantza sailburuordearekin batera. Bertan ezagutu du ekonomia zirkularraren proiektua, batez ere ehungintzako objektuak bildu, berreskuratu, birziklatu eta berrerabiliz garatzen dena. Koopera irabazi-asmorik gabeko erakundea da, eta pertsona ahulenak laneratzea du helburu, laguntza bidezko enpleguaren bidez. Pablo Aretxabala Kooperako koordinatzaileak, Josetxu Gonzalez Zainketa Saileko arduradunak eta Zuriñe Fernandez proiektu eta diru-laguntza teknikariak hartu dituzte, besteak beste.
Mendia ehunak tratatzeko instalazio automatizatuan ibili da, eta jantziak edukiontzietan jaso ondoren sartzen direnetik ateratzen diren arte, birziklatuta edo Kooperak hiri askotan dituen dendetan salgai jartzeko erabiltzen diren tratamendu-prozesua egiaztatu du.
Horrelako enpresen garrantzia indartu ondoren, ekonomia zirkularraren parte izateaz gain, ahulenak sartzen eta lan-merkatu normalizatura igarotzea errazten baitute, lehendakariordeak esan du eredu hori bat datorrela berriki onartutako 2030 Enpleguaren Euskal Estrategian jasotakoarekin.
Mendiak gogorarazi duenez, EEEk bereziki azpimarratzen ditu «hamarkada baten buruan sortuko diren aukera berriak, eta enplegu politika aktiboak kalitatera bideratzeko helburu partekatua». Ildo horretan, nabarmendu du estrategiak bat egiten duela Gobernu Programaren ardatzekin, Berpiztu programarekin, Espainiako Gobernua diseinatzen ari den Estrategiarekin berarekin, Next Generation EU proiektuarekin eta Nazio Batuen Garapen Iraunkorreko Helburuekin, zehazki, lan zintzoari eta hazkunde ekonomikoari buruzkoarekin; izan ere, azken horrek enpleguko zerbitzu publiko aktibatzaileak diseinatzera eta kalitatezko enpleguak bermatuko dituzten formula ekonomiko berritzaileen, jasangarrien eta inklusiboen alde egitera behartzen ditu Administrazioak «.
Era berean, bileran zehar, Kooperako arduradunek Covid-19ren krisiari aurre egiteko martxan jartzen ari diren Europako funtsez ere hitz egin ahal izan dute, baita Kooperak funts horietara sartu eta proiektu berriak hasi ahal izateko duen esperientziaz ere.
