Mariasun Quiñones lehen aldiz agertu da hedabideen aurrean Lezaman. Atezain zur-gorri berriak ez du ezkutatzen Realetik heldu ostean Athletic Cluben etapa berri bati ekiteko duen energia: “Lan-karga handia izaten ari da, baina oso pozik gaude. Lan horrek handien aurka lehiatzeko indarra emango digu. Liga gero eta zorrotzagoa da, eta gu ez gara gutxiago izango”.
Hondarribikoak, 24 urterekin, heldutasun handia erakusten du: “Normalean espektatibarik gabe joaten naiz lekuetara. Instalazio handiak eta profesional onak aurkitu ditut hemen, eta lan egiteko gogo handia ere bai. Hazten eta hobetzen jarraitu nahi dut, eta uste dut hau leku ona dela horretarako. Anbizio handiko taldea daukagu partida bakoitzean borrokatzeko eta lehiatzeko”.
Zazpi denboraldi egin zituen talde donostiarrean Quiñonesek: “Reala uztea erabaki zaila izan zen, baina uste dut Athletic bezalako klub baten parte direla pertsona gutxik esan dezaketela; pribilegiatua sentitzen naiz, ahalik eta gehien gozatuko dut”
Anbizio handienarekin
Talde bezala dituen helburuei dagokienez, Quiñonesek “mugituko gaituzten eta identifikatuta sentituko garen helburuak lortzeko lan egingo dugu. Ahalik eta puntu gehien lortzen saiatuko gara. Ausartak eta oldarkorrak izan behar dugu, eta gure joko-estiloarekin identifikatuta sentitu”
“Maila pertsonalean, partidak jokatzeko eta hamaikakoan egoteko lan egingo dut. Erabakiak ez dira nireak, entrenatzailearenak baizik. Ahalik eta gehien egingo dut nire mailak hazten jarrai dezan eta taldeari ahalik eta ekarpen handiena egin ahal izateko. Behin hori gertatuta, ongi etorria izango da etortzen dena”, esan du Hondarribikoak.
