Euskadiko Kooperatiben abenduaren 20ko 11/2019 Legea aldatzeko lege-proposamena aintzat hartzearen aldeko irizpidea duela adierazi du Gobernu Kontseiluak gaur, asteroko ohiko bileran. Horrela, bete egiten da Aldebiko Lankidetza Batzordearen 2020ko maiatzeko akordioa, Estatuko Administrazio Orokorraren eta Euskal Autonomia Erkidegoko Administrazioaren artekoa, eta legearen baldintza batzuei buruzko eskumen desadostasunak gaindituta geratzen dira.
Lege-proposamena EAJ, PSE eta PP+Ciudadanos legebiltzar taldeek egin dute eta Eusko Jaurlaritzak, Gobernantza Publiko eta Autogobernu Sailak proposatuta, Legebiltzarreko tramitaziorako argi berdea ematea erabaki du. Horrela, Bitariko Batzordearen akordioa betez, Covid-19k sortutako pandemiaren ondorioz sortutako arazoari erantzuten zaio, horrek kooperatiben estatutuak aldatzea zaildu edota galarazi baitu. Horren bidez, estatutuak Kooperatiben Legera egokitu nahi dira, legeak ezarritako epean. Lege proposamenak epe hori luzatzea jasotzen du.
Bestalde, pandemia dela-eta metatutako esperientziaren ondoren, kooperatiba-organoek bilerak formatu telematikoetan egiteko aukera izango dutela ezartzen du lege proposamenak. Batzar Nagusiaren eta gainerako organoen arteko aldeak ezartzen dira, kooperatibetako bazkideentzako berme egokiak ezartzen baitira. Aldaketa horiekin, sektorearen eskaerei erantzuna ematen zaie, eta Euskadiri kooperatiba-sozietateen beharretara egokitutako araudia ematen zaio.
